8-октябрдиз Кьурагьрин стадиондал­, ОМОН-дин къуллугъчи, милициядин­ капитан, 1999-йисан 2-августдиз кIва­лахдин везифаяр тамамардайла телеф хьайи, вичин ери-бине Куквазрин­ хуьряй тир Закир Султанован экуь къаматдиз бахшна, футболдай 14-сеферда турнир кьиле тухвана. Идакай­ чаз райадминиcтрациядин пресс-къул­лугъ­ди хабар гана. Турнирда Кьиб­­­ле­па­тан Дагъустандин районрай атанвай, 2011-йисуз дидедиз хьанвай жаванрикай ибарат командайри иштиракна.

Райондин администрациядин физкультурадинни спортдин ва жегьилрин крарин рекьяй отделди терроризмдин таб­­лигъатдиз акси серенжемрин сергьят­ра аваз кьиле тухузвай и турнирдин макь­сад Закир Султанован экуь къамат рикIера хуьн, жаванрин арада футбол машгьурун, гьакIни акьалтзавай несил ватанпересвилин руьгь­даллаз тербияламишун, спортсменрин устадвал хкажун, абурун арада дуст­вал мягькемарун я.

Къугъунра «Кьурагь» командади — 1, Ахцегь ва Мегьарамдхуьруьн районрин командайри 2 ва 3-чкаяр кьуна.

КIвенкIвечи чкаяр кьур вири командаяр кубокриз, медалриз, грамотайриз ва спортдин пишкешриз лайихлу хьана. Командайрив ва турнирда виридалайни хъсандиз  къугъвай футболистризни шабагьар гана. Карчи Надир Бабаеван патай абурув пулдин пишкешарни агакьна.

Гъалибчийрив шабагьар вахкуниз талукьарнавай мярекатдал администрациядин физический культурадинни спортдин ва жегьилрин крарин рекьяй отделдин начальник Рамиз Рамазанова ва Кьурагьрин 1-нумрадин юкьван школадин директор Гьамид Мисриева кьегьал рай­он­эгьли, Жуьрэтлувиляй (кьейидалай кьулухъ) ордендин сагьиб Закир Султанован уьмуьрдин рекьикай суьгьбетна, аялрихъ спортда, кIелунра агалкьунар хьун алхишна.

Рагнеда Рамалданова