Исятда гатун тIатIилрин вахт ятIани, СтIал Сулейманан райондин образованидин хилен идарайриз, къуллугъчийриз секинвал авач: абуру 1-сентябрдиз башламиш жедай цIийи кIелунин йисаз гьазурвилер аквазва. И кIвалах Испикрин юкьван школада гьикI тешкилнава?

Анин директор Регина Агьмедовади лагьайвал, школа вилик йисара эцигнавай куьгьне дараматда кардик ква. Ана капитальный ремонт кьиле тухун тавуна 50 йис я. Анжах, 2022-йисуз пищеблок госпрограммадин сергьятра аваз, цIийикIа туькIуьр хъувунай.

Алай вахтунда школада ремонтрин кIвалахар пландин бинедаллаз тешкилнава. Куьгьне хьанвай дакIарар пластикадинбуралди эвеззава. И кIвалахар кьиле тухвана акьалтIарнава лагьайтIа жеда.

- Пластикадин дакIарар кутун патал, гьелбетда, пулунин, такьатрин лазимвал авай, - лугьузва Регина Агьмедовади. - И карда чаз райондин кьил Саид Темирханова куьмек гана: адан тапшуругъдалди муниципалитетдин бюджетдай герек кьадар пулунин такьатар ахъайна. Идай ва чаз гузвай маса куьмекрай школадин муаллимри, кIелзавайбуру ва абурун диде-бубайри райондин кьилевайбуруз сагърай лугьузва.

Школада дараматдин цларик, полдик, къавук, ракIаррик квай нукьсанар арадай акъудунин, гьаятар къайдадиз гъунин, аквадай агитациядин такьатар цIийи хъувунин, материально-технический база мягькемарунин рекьерайни кIвалахар тухузва.
Регина Агьмедовади чаз лагьайвал, ремонтрин кIвалахар давамарунихъ галаз сад хьиз, анин гьаятда 50 кубометр яд гьакьдай пожарный гьамбархана эцигзава.

- ЦIийи кIелунин йисаз чун 1-сентябрдалди вири патарихъай тамамвилелди гьазур жеда, - алава хъувуна Регина Агьмедовади. 

Хазран Кьасумов