20-апрелдиз Эминхуьре лезги чIалан муаллимрин арада «Лезги газетдин» редакцияди, «Леки» фондуни ва ФЛНКА-ди, сифте сеферда яз, конкурс кьиле тухвана. Шегьерра, районра лезги чIалан тарсар гузвай вири муаллимриз конкурсда иштиракдай ихтияр авай.

35 муаллимди иштиракай конкурсдин нетижада 1-чкадиз виридалайни гзаф баллар къазанмишай Мегьарамдхуьруьн райондин Хожа-Къазмайрин мектебдин муаллим Марият Рамазанова (60 балл) лайихлу хьана, 2-чкадиз – CтIал Сулейманан райондин ЦIийи Макьарин мектебдин муаллим Рамиз Идрисов (58 балл), 3-чкадиз – СтIал Сулейманан райондин Вини СтIалрин мектебдин муаллим Минаят Муталибова (57 балл).

Гъалиб хьайи муаллимдиз 30 агъзур манат пул ва диплом, 2-чка кьурдаз 20 агъзур манат пул ва диплом, 3-чка кьурдаз 10 агъзур манат пул ва диплом гана.

Тафаватлу хьайи муаллимрив шад гьалара пишкешар вахкунин мярекатда «Лезги газетдин» кьилин редактор Мегьамед Ибрагьимова, конкурсдин жюридин председатель Куругъли Ферзалиева, «Леки» фондунин векил Руслан Мегьдиханова, ФЛНКА-дин президент Васиф Гьасанова, жемиятдин деятелар тир Садикь Гьасанова, Навои Бутаева, Самур Алиева ва масабуру иштиракна.

Лезги Фетгьуьллагь