ЧIехи Гъалибвилин 80 йисан­ юбилейдин суварин ви­лик квай йикъара СтIал Су­лей­­манан­ райондай дяведин махсус серенжемда иштиракзавай чи кье­гьал рухвайриз, савкьат яз, УАЗ-452 автомашин рекье туна.

Ихьтин баркаллу кардик кьил кутурди «Зардиян» ООО-дин чIе­­хибур ва райондин администрация я. Къейд ийиз кIанзава хьи, СтIал Сулейманан райондай дяведин махсус серенжемда 700-далай виниз ватанперес кьегьалри иштиракзава.  Абуру чпин вилик эцигзавай гьар са тапшуругъ ­уьтквемвилелди тамамарзава, душмандиз рикIелай тефидай ягъунар кьазва. Абурукайни сад Сайтархуьряй тир старший лейтенант, ротадин командир, Рос­сиядин Игит лагьай тIварцIиз ­лайихлу хьанвай Муслим Муслимов я.

Автомашиндихъ галаз женгчийриз райондай Курхуьруьн 1-нумрадин юкьван школадин коллективди кIватIай сифте нубатда герек къвезвай шейэр тунвай посылкаяр, аялри аскерриз кхьенвай чарар рекье туна.

Донбассдай хабар хтайвал, суварин савкьатар чи аскеррив агакьна. Абуру райондин, «Зардиян» ООО-дин ва Курхуьруьн школадин регьберриз, аялриз рикIин сидкьидай сагърай лагьана.

— Уьлкведин итижар патал махсус серенжемда женгер­ чIугваз­вай ватанэгьлийрин гьакъиндай къай­гъударвал авунихъ еке метлеб ава, — лугьузва райондин администрациядин кьил Саид Темирханова. — Ида абурун руьгь хкажзава. Райондихъ галаз датIа­на алакъа хуьни, аскеррин хизанриз жуьреба-жуьре куьмекар гуни СВО-дин иштиракчийриз акьалтзавай вири четинвилер алудунин кардани куьмек гузва. Абуру­ командиррин тапшуругъар ви­кIегь­диз кьилиз акъудзава.

Украинадин миллетбазар, цIийи фашистар терг авунин умуми кардик, женгина авайбурухъ галаз сад хьиз, гьар са ватанэгьлидивай вичин пайни кутаз жеда, гьакъисагъвилелди зегьмет чIу­гуналди, СВО-дин иштиракчийриз­ игьтияж авай шейэр рекье туналди, аскеррин хизанрин, аялрин гьа­къиндай къайгъударвал авуналди.

Къецепатан душманар чи халкьарин арада чуьруьк, къал­ма­къал­ тваз, халкьар сад-са­даз акси акъвазариз алахънавайла, чи халкьар сад хьунихъ еке метлеб ава. Тарихдин делилри тестикьар­за­вайвал, садвал вине кьунвай халкьдал ва адан армиядал садавайни гъалибвал къазанмишиз жедач.

Абад Азадов