ЦIийи ктаб
Алатай гьафтеда Ахцегь райондин Луткунрин хуьряй тир Амрагьан хва, диндин алим, Дагъустандин имам аш-Шафиидин тIварунихъ галай Исламдин, Медина шегьерда авай Исламдин международный университетар акьалтIарнавай ва Къуръандин манайрин таржумаяр лезги чIалаз элкъуьрна, кьилдин ктаб яз чапдай акъуднавай Ямин гьажи Мегьамедован гъиликай нубатдин ктаб хкатна. Махачкъалада, “Мавел” чапханада, “Инсаниятдиз чешнелу ксар” тIвар алаз, 1000 экземпляр тираж аваз ктаб акъатнава.
Ана кьуд халифадикай — Абу-Бакр ас-Сиддикьакай (Аллагь рази хьурай вичелай), Умар ибн ХатIтIабакай (Аллагь рази хьурай вичелай), Усман ибн Аффанакай (Аллагь рази хьурай вичелай), Али ибн Аби-ТIалибакай (Аллагь рази хьурай вичелай) гегьенш делилар ва Мугьаммад пайгъамбардин (къуй Аллагьдин патай салават ва саламар хьурай вичиз) асгьабрин келимаяр (Аллагь рази хьурай чпелай) гьатнава.
Ктаб Махачкъалада кардик квай лезгийрин марифатдинни медениятдин “Тербия” макандин къаюмвилик кваз чапнава.
Маса гузвай къимет 150 манат я. И ва Ямин Мегьамедован виликдай акъатнавай диндин ктабар “Лезги газетдин” редакциядай маса къачуз жеда. Абурун арада “Пак Къуръан ва адан манайрин таржума лезги чIалал” (1000 манат), “Пайгъамбардин (къуй Аллагьдин патай саламар ва салават хьурай вичиз) уьмуьрдин рехъ” (500 манат), “Исламдин эдебар, ахлакьар ва дуьаяр” (100 манат) ктабар ава.
Къейд ийин хьи, мискIинриз, медресайриз, образованидин идарайриз винидихъ тIварар кьунвай ктабар гьавая гузва.
Агьмед Магьмудов
