Мегьарамдхуьруьн районда Ватан патал чанар къурбанд авур кьегьалрин экуь къамат эбеди авуниз кьетIен фикир гузва. Акьалтзавай несилриз игитрин тIварар, абурун баркаллу крар чир хьун патал къагьриман рухвайрин тIварарихъ куьчеяр, кьилдин идараяр язава, абуруз бахшнавай мярекатар тешкилзава.
Украинада кьиле физвай махсус серенжемда вишералди дагъустанвийри кьегьалвилер къалурзава. Гьайиф хьи, телеф хьайибурни ава. Абурукай сад бине Хъуьлуьдрин хуьряй тир Россиядин Игит Мегьамедали Мегьамеджанов я.
ЧIехи Гъалибвилин 80 йисан юбилейдин мярекатрин сергьятра аваз, Мегьарамдхуьруьн 2-нумрадин ДЮСШ Россиядин Федерациядин Игит Мегьамедали Камильевич Мегьамеджанован тIварцIихъ янава. И кардиз талукьарнавай мемориалдин кьул ачухунин мярекатда райондин кьил Фарид Агьмедовани иштиракна.
Гъалибвилин сувариз талукьарна, муниципалитетда кьиле фейи мярекатдал Ф.Агьмедова къейд авурвал, алай вахтунда СВО-да иштиракзавай чи ватанэгьлияр Ватандин ЧIехи дяведин йисара чи чIехи бубайри къалурай кьегьалвилер давамарзавай игитар я.
«Вичин вири уьмуьр хайи чил хуьниз бахшай рухвайрикай сад Россиядин Игит, 18-армиядин командующийдин заместитель, махсус серенжемда телеф хьайи Мегьамедали Мегьамеджанов я. Ада Ватан патал гзаф крар авуна, кьегьалвилер къалурна. Игитдин экуь къамат эбеди авунин ниятдалди чна Мегьарамдхуьруьн аялрин 2-нумрадин спортшкола адан тIварцIихъ ядай къарар кьабулна», — лагьана Ф. Агьмедова.
Чи мухбир
