И йикъара Ахцегь райондин администрацияда Ахцегьрин ичерин сувар кьиле тухуниз гьазурвилер акуниз талукь тешкиллувилин заседание кьиле фена. Идакай чаз райондин администрациядин пресс-къуллугъди хабар гана.
Райондин регьбер Абдул-Керим Палчаеван регьбервилик кваз гьар са месэла веревирдна: куьчеяр гуьрчегдиз чIагурун, кьилди-кьилдин майданар тешкилун, концерт кьиле тухун ва мугьманар кьабулун.
«Чи макьсад неинки вахт шадвилелди акъудун, гьакIни мярекатдикай гьакъикъи нетижа хкудун я», — лагьана А.-К. Палчаева.
Къейд ийин хьи, Ахцегьрин ичерин югъ гьар йисуз кьетIендаказ къейдзавай сувариз элкъвенва. Гзаф тIямлу, масабурулай тафаватлу ичерин машгьурвал арадал хкун патал алатай йисара Ахцегьа цIийи-цIийи багълар кутуна. ЦIи и сувар кьиле фидай югъ гьелелиг тайин туш.
Райондин кьили алава хъувурвал, и сувар ата-бубайрин зегьметдин ярж я. Ада чи йикъарани зегьметкеш инсанрик гьевес кутун, алакьунар авайбуруз рехъ гун ва район еримлу авун герек тирди лагьана.
Малум хьайивал, ичерин суварин юкъуз СВО-дин иштиракчийриз гуманитарный куьмек ракъурдайвал я, гьа жергедай яз ал-яру ичерни.
С. Салимов
