Хайи чIал хуьнай
Ахцегь райондин кьил Абдул-Керим Палчаев «Лезги газетдин» редакциядин медалдиз лайихлу хьана.
Россияда 1-сентябрдилай 2027-йис патал газетарни журналар кхьидай вахт гатIуннава. Адет тирвал, «Лезги газетдин» редакциядин векилри гьар йисуз газетар, журналар кхьизвай чIавуз районрин кьилерихъ, зегьметчи коллективрихъ, хуьрерин агьалийрихъ галаз гуьруьшар кьиле тухузва.
10-сентябрдиз газетдин кьилин редактор, РФ-дин журналистрин союздин Дагъустанда авай отделенидин председатель Мегьамед Ибрагьимов Ахцегь райондин кьил Абдул-Керим Палчаевахъ галаз муниципалитетдин администрацияда гуьруьшмиш хьайила, абуру хайи чIал хуьниз ва вилик тухуниз, и карда милли чIаларал акъатзавай газетри, журналри кьунвай чкадиз, акьалтзавай несилрин арада лезги чIал машгьурун патал районда кьиле тухузвай кIвалахдиз талукь месэлаяр веревирдна.
Мегьамед Ибрагьимова хабар гайивал, эхиримжи йисара Ахцегь районда «Лезги газет» кхьизвайбурун кьадар артух хьанва, 2026-йисуз абурун кьадар 1000-далай алатна. Адан фикирдалди, муниципалитетдин хуьрера яшамиш жезвай агьалийрин умуми кьадар фикирда кьуртIа, им лайихлу рекъем я.
Вичин нубатда Абдул-Керим Палчаева республикадин дережада аваз лезги чIалал акъатзавай кьилин газетдин коллективдиз хайи чIал хуьнин ва вилик тухунин кардик лайихлу пай кутунай сагърай лагьана, редакциядин векилрихъ кIвалахдин рекье мадни еке агалкьунар хьун алхишна. Ада гьакIни райондин мектебра аялрин, дидед чIалан тарсар гузвай муаллимрин арада конкурсар тешкилзавайдакай, тафаватлу жезвайбуруз пулдин пишкешар гузвайдакай хабар гана.
Абдул-Керим Палчаева къейд авурвал, Ахцегь райондин агьалийри хайи чIалал акъатзавай газетар, журналар рикI алаз кхьизва: гьам республикадинбур, гьамни райондин «ЦIийи дуьнья» газет. Чкадал почтадин алакъадин отделенияр, «Даггосиздатдин» киоск кардик ква, яни агьалийриз газетар, журналар кхьинин карда вири къулайвилер ава. Райондин кьили ахцегьвийри 2027-йис патални газетар, журналар кхьинин жигьетдай активнивал къалурдайди тестикьарна.
Гуьруьшдин эхирдай Мегьамед Ибрагьимова хайи чIал хуьник ва вилик тухуник чIехи пай кутунай, лезги медениятдин машгьур векилрин къамат эбеди авунай Ахцегь райондин кьилевайбурун тIварцIихъ разивилин келимаяр лагьана ва Абдул-Керим Палчаевав «Лезги газетдин» редакциядин медаль вахкана.
Агьмед Магьмудов