Кьиблепатан Дагъустандин­ са жерге районрин мектебра, ФЛНКА-ди арадал гъанвай «Лезги мектеб» проектдин сергьятра аваз, гатун вахтунда аялриз лезги чIалай чирвилер гун патал махсус тарсар кьиле физва. Къейд ийин хьи, цIи кьвед лагьай сеферда кьилиз акъудзавай и проектди нетижаярни гузва.

Мукьвара проектдин регьбер Артём Ибилкьасумовни ФЛНКА-дин вице-президент Гьуьсен Шагьпазов тарсар кьиле физвай гьалдихъ галаз мукьувай таниш хьун патал Кьурагьрин, Штулрин ва КIутIларин мектебриз мугьман хьана. Чкайрал абур муаллимрихъ, тарсариз къвезвай аялрихъ галаз рахана, бес кьадар ктабар авани, авачни чирна. Малум хьайивал, аялар тарсариз ашкъидалди къвезва, гьикI лагьайтIа, муаллимри абур итижлудаказ, аялрин рикI ацукьдайвал тешкилзава.

Хайи чIал хуьнин ва вилик тухунин карда «Лезги мектеб» проектдихъ еке метлеб ава. Гатун вахтунда ял ягъун патал шегьеррай хуьрериз хквезвай аялриз дидед чIал чирдай мумкинвал гун тариф авуниз лайихлу кар я. ДекIени гатун вахтунда ихьтин тарсар гьар са лезги хуьре жен. Гаф кватай чкадал къейд ийин хьи, цIи пуд лагьай сеферда Кьурагь райондин КIирийрин хуьре кардик кутунвай «Лекьрен муг» этнолагердани (лагердин регьбер – Садикь Гьасанов) лезги чIалан тарсар тухузва.