И йикъара РД-дин информациядинни печатдин Агентствода дяведин махсус серенжемдин зонада кIвалахзавай журналистриз региондин дережада куьмекар гунин месэладиз талукь совещание кьиле фена. Ана Агентстводин кьил Арсен Юсупова, РД-дин Кьилин пресс-къуллугъдин ва информполитикадин отделдин начальник Амина Омаровади, «Сад лагьай каналдин» корреспондент Гьуьсейн Гьуьсейнова ва масабуру иштиракна.
Къейд авурвал, каналдин операторрин, журналистрин дестеди СВО гатIунай сифте йикъарилай дагъустанви аскеррин женгинин гьерекатрикай, гьунаррикай халкь хабардарунин рекье зегьмет чIугвазва.
Агентстводин регьберди иштиракчияр военный корреспондентриз куьмек гун патал туькIуьрнавай серенжемрин проектдихъ галаз танишарна. Ихьтин серенжемар кьабулунин важиблувиликай РД-дин Кьил Сергей Меликова ноябрдин эхирра ачух эфир кьиле тухвай вахтунда НТВ-дин корреспондент Омар Мегьамедова лагьанай.
Фикирдиз къачунвай серенжемрик гьам такьатрин куьмекар гун, гьамни журналистар патал кьезилвилерин къурулуш арадал гъун ква.
Къейд ийин, мярекатдин сергьятра аваз А. Юсупова малумарайвал, уьлкведа гьар йисан 15-декабрдиз чпин къуллугъ кьилиз акъуддайла телеф хьайи журналистар рикIел хкизва.
Чи мухбир
