Рекъемри лугьузва

Кьве йисан къене яшар 0-дилай 17 йи­салди тир аялар кьин Дагъустанда­ 34,5 процентдин тIимил хьанва. Кьилди­ къачур­тIа, анжах са эхиримжи йисуз и ре­къем­ 25,8 процентдин агъуз аватнава. Идакай, махсус мярекатдал раижай­ къейдерал асаслу яз, Дагъус­тандин здравоохраненидин министерстводин телеграм-каналди раижзава.

Хабар гузвайвал, кьилди къачуртIа, яш са йисалай тIимил тир аялар кьиникь­ гьа и кьве йисан къене 45,6 процентдин­ тIимил хьанва. ИкI, и жигьетдай кьве ре­къемни (яни 0-17-яшарин ва 1 йис тахьан­вай аялрин) галаз-галаз кьве йисуз агъуз аватзава.

И мярекатдал раижайвал, меди­цина­­дин куьмек къачузвай чкадилай­ аслу­ ту­шиз­, агъур гьалда авай гьич са аялни­ рес­пуб­ликадин дережадин пешекаррин ди­­къет­дик квачиз амукьна кIан­дач. Гьави­ляй эхиримжи кьве вацра здра­во­ох­ра­не­нидин министерстводи ихьтин вири­ дуь­шуьшар­ ахтармишун (мониторинг) кьиле­ тухузва. Ми­нистерстводин гуьзчивилик кваз кIва­лах­дик Дагъустандин тежрибалу духтурар экечIзава, абуру­ сагъар хъувунин серенжемдин къайда санал тайинарзава. Чешмеди раижзавайвал, духтуррин бригадаяр азарханайриз физва.

Дишегьлидин кIвачел заланвилин муддат гуьзчивилик кутун ва цIийиз хьанвай чагъа сагъар хъувунин серенжем кьиле тухун патал аял жедалди мумкин тир хаталувилер винел акъудзава.

Идалай вилик и чешмеди махсус мярекатдал раиж авур къейдерал асаслу яз, Дагъустанда 2026-йисан 6 вацра 18 103 аял дуьньядал атанвайдакай хабар ганай.­

10 агъзурдалай гзаф

Гьеле 10 агъзурдалай гзаф Дагъус­тан­вийри хизандин гьар йисан выплата­ МФЦ-дай туькIуьрнава. Идакай Дагъустан­дин МФЦ-дин телеграм-каналди хабар гузва.

Раижзавайвал, и серенжемдин сергьятра аваз, агьалийривай кьунвай НДФЛ-дин 6 процент туна, амай такьатар элкъуьрна вахкузва (яни 13 процентдикай 7 процент). Анжах выплата къачун патал хизандин гьалар тайинарнавай са жерге уьлчмейрихъ галаз кьадайвал хьана кIанзава. Кьилди къачуртIа, абурук ихьтин шартIарни акатзава: хизанда чпин яшар 18-йисалди тир 2 ва я адалай гзаф аялар хьун, хизанда гьар са касдал ацалтзавай юкьван гьисабдин къазанжи регионда кьилдин гьар са агьали патал тайинарнавай 1,5 ПМ-дилай (прожиточный минимум) гзаф тахьун ва мсб.

Чешмеди къейдзавайвал, и выплатадин гьакъиндай арзаяр МФЦ-дай «Гос­къул­лугъар» порталда ва я СФР-да гуз жеда.

Идалай виликни чна къейд авурвал­, тамамдиз и серенжемдикай интернет­­дин жуьреба-жуьре чешмейрайни­ чи­риз­­­ жеда. И выплатадин гьакъиндай­ (яни 2025­-йисан НДФЛ-­дин тайин пай вах­чун патал) арзаяр 2026­-йисан 30-­сентябрдалди кьабул­зава.

РикIел гъизва

«ЕГП» (единый гарантированный поставщик) компанияди муьштерийрин ри­кIел гъизвайвал, абурухъ ишлемишнавай электроэнергиядин гьакъи комиссия ва пеня галачиз гудай мумкинвал ава. Идакай Дагъустандин энергетикадин ва тарифрин министерстводин телеграм-ка­нал­ди хабар гузва.

Чешмеди къейдзавайвал, комиссия галачиз гьакъи гун патал ихьтин къайдайрикай менфят къачуз жеда:

– «ЕГП Онлайн» приложенида (ам App Store, RuStore... платформайрай ска­чатиз жеда);

– «ЕГП» компаниядин официальный сайтда авай хсуси кабинетда (ЛК, Личный кабинет);

 – «ЕГП» компаниядин муьштерий­риз къуллугъдай центрайрин кассайра (адресрин сиягьдиз и чешмедин телег­рам-каналдай килигиз жеда) ва мсб.

Гьа са вахтунда чешмеди агьалийрин дикъет ихьтин кардал желбзава: банкарай ва терминалрай гьакъи гудайла, патан тешкилатди комиссия кьун мумкин я.

ГьакIни раижзавайвал, «ЕГП» компа­ниядин муьштерийриз 2026-йисан 15-сен­тябрдалди вахтундамаз гьакъи гун таву­най пеня ракъурдач, яни вахтундамаз гьакъи тагунин пеня винел атунин серенжем 16-сентябрдилай кардик акатда.

Арадал атай суалрин патахъай агьалийривай и контакт-центрадиз зенг ийиз­ жеда: 8 (800) 250-16-56 (гьар юкъуз­ ­экуь­­нин сятдин 8-далай йифен сятдин 9-далди).

РикIел хкин, идалай вилик «Дагъустан патал газ» телеграм­-каналди раижайвал­, регионда газ ишлемишзавай саки гьар пуд лагьайда и къуллугъдай онлайн къайдада гьакъи гузва. ИкI, арада мензил аваз гьакъи гунин къайда региондин гьеле 195 агъзур агьалиди хкянава. Им газ ишлемишзавайбурун умуми кьадардикай 30 процент я.

Чешмеди раижзавайвал, газ ишлеми­шунай, офисдиз фин тавуна, «Мой Газ» (Android патал) ва я «Газ Онлайн» (iOS патал) мобильный приложенийрай, гьакI­ни «Газпром межрегионгаз Махачкала» карханадин сайтда хсуси кабинетдай (личный кабинет) гьакъи гуз жеда.

Гьазурайди – М. Агьмедов