Гзаф хьанвайди къейдзава
Эхиримжи йисара Дагъустанда колледжрин ва техникумрин выпускникрин умуми кьадар гзаф хьанвайди къейдзава. Эгер 2023-йисуз абурун кьадар 18 396 кас тиртIа, 2026-йисуз 24 494-дав агакьнава, хабар гузва РД-дин образованидин ва илимдин министерстводи.
Къейдзавайвал, выпускникрин къурулушдин дегишвилери региондин кIвалахдин чкайрин базардин игьтияжар къалурзава.
Виридалайни чIехи пай выпускникар «Здравоохранение» (32,48 процент) ва «Технический илимар» (24,84 процент) хилерал гьалтзава – ахтармишнавай вири йисарин вахтунда и хилерай чирвилер къачузвайбурун кьадар сифте чкадал алаз хьана. ГьакIни хейлин кьадар (24,36 процент) выпускникар «Экономика ва ихтиярар» хилел гьалтзава. Образованидин ва физкультурадин хилерани (11-12 процент) гьалар, гегъигайла, дурумлудаказ амазма.
Гьа са вахтунда «гуьтIуь» рекьерай (къуллугъар тамамарун, реклама ва делопроизводство) гьазурун лап агъада амукьнава – выпускникрин умуми кьадардин 1,2 процентдилай гзаф тушиз.
2022-2026-йисара Дагъустанда, СПО-дин идарайрин выпускникрин пешекарвилин дережадиз аслу тушир къимет гунин алат яз, демонстрационный имтигьанар тухунин майданар гегьенш хьанвайди къейдзава. Вад йисан вахтунда асул тушир къимет гунин и къайдада ахтармишай студентрин кьадар тахминан 30 процентдин гзаф хьанва – 3 890 касдилай 8 930 адав агакьдалди.
«Кьадар икьван гзаф хьуни демонстрациядин имтигьан государстводин нетижаяр кьадай аттестациядин къурулушдиз къвердавай гзаф мукьва ва сих жезвайдакай, гьакIни кIвалахдалди таъминарзавайбуру и къайдадиз къвердавай гзаф ихтибар ийизвайдакай лугьузва», – къейдзава министерстводи.
Дагъустан Республикадин Гьукуматди 2024-йисан 13-майдиз тестикьарнавай «2030-йисал кьван фидай рекьерин картадин» сергьятра аваз, колледжра ва вузра гележегдин пешедин рекьяй виликди финиз талукь центраяр кардик кутунва, тежриба ва дуальный (гьа са вахтунда чирвилер – кIелзавай чкада къачудай, тежриба - карханада) къайдада кIелунин майданар, кIвалахдалди таъминарзавайбурухъ галаз алакъа аваз гегьеншарзава, гьакIни, экономикадин игьтияжар фикирда кьуналди, и ва я маса рекьяй кьабулзавай абитуриентрин кьадардал гуьзчивалзава. Къейдзавайвал, 2030-йис алукьдалди, кIелзавай вахт куьтягь хьайила, хкянавай рекьяй кIвалахдалди таъмин тир СПО-дин выпускникрин кьадар 2024-йисуз авай 22 процентдилай 71 процентдал кьван гзаф хьун лазим я.
Чи мухбир