Малум тирвал, апрелдин 15-17-йикъара Дагъустандин дагълух районра къалин живер къвана. Бязи чкайра гьатта метрдив агакьна ацукьай къалин живеди 16 райондин 68 хуьруьхъ галаз машиндин алакъа атIана. Иллаки еке хасаратвилер электроэнергиядин симеризни шалманриз хьана: электричество, телефондин, интернет-алакъа атIана…
Кьиблепатан Дагъустандин Агъул, Ахцегь, Докъузпара, Рутул ва Кьурагь районра хаталу гьалар арадал атуникди РД-дин Кьил Сергей Меликован къарардалди анра ЧС-дин къайдаяр малумарна.
— Гьелбетда, дагълух шартIара къалин живер виликрайни къвайиди чаз чида, амма гатфариз, апрелдин эхирда, ихьтин живер къун чи рикIел аламач. Им тIебиатдин бедбахтвал я, — лугьуз хьана агъсакъалри.
Эхь, гатфарин марф, жив берекат я лугьуда. Амма и жив гьакъикъатдани тIебиатдин бедбахтвилиз элкъвена. Кьилди къачуртIа, Ахцегь райондин бязи чкайра жемят саки тамам гьафтедин муддатда электричестводикай магьрум яз амукьна. Интернетдин алакъа тамамвилелди гуьнгуьна гьат хъувун патал якъин са варз вахт кIанда: вири кабелар чилерал ала. Цуькведавай емишрин гзаф тарар ханва (еке аязар тахьуникди, Аллагьдиз шукур, абур терг хьанач), бязи ксарин яшайишдин кIвалерин къавар аватна…
Ихьтин гьалар акваз, 18-апрелдин пакамахъ «Ахцегь район» МР-дин кьил Абдул-Керим Палчаева кьетIен гьаларай заседание тухвана, анал районда гьалар гуьнгуьна хтунин серенжемар кьиле тухунин гьакъиндай къарар кьабулна. ТIебиатдин бедбахтвилин хасаратвилер хсуси къуватралди алудиз тежедайди аннамишна, республикадин регьбер хабардарна. Разивилелди къейд ийин, Сергей Меликова, месэла вичин гуьзчивилик кутуналди, Ахцегьиз куьмекар ракъурна. ИкI, Избербаш, Къизляр, Буйнакск, Къизилюрт шегьеррай ва Ботлих, Табасаран, Сергокъала, Хив районрай чпин техникани гваз бригадаяр атана, райондин умуми къуватрихъ галаз санал абур токдин шалманарни симер туькIуьр хъувунин (виридалайни еке зиянар ЛЭП-риз хьанвай) ва ремонтрин кIвалахрив эгечIна.
— Эхь, чаз рикIелни алачир мелер хьана. 24-апрелдалди, хсуси ва паталай атанвай куьмекрин къуватралди райондин яшайишдин саки вири объектар чна электричестводалди таъминар хъувуна, — лугьузва Ахцегь райадминистрациядин кьилин ва райондин КЧС-дин председателдин заместитель Роберт Гьамзаева. — Ахцегьрин, Хкемрин, Хуьруьгрин, Луткунрин, КьакIарин, гьакI Хинерин, Гутумрин, Фиярин, Смугъулрин, Чеперин, Къутункъарин хуьрерин жемятриз электричество хганва. КIвалахар гзаф ава, анжах са Хинерин дереда ханвай 51 шалман дегишарна, районда санлай 150-дав агакьна токдин шалманарни цIуд километрийралди ЛЭП-дин симер ава. Районда ЛЭП-дин къурулуш авайдалайни хъсан хъхьана. Еке хасаратвилер дагъдин рекьеризни хьанвай, гьабурни туькIуьр хъийизва. Живедин маргъалрин хаталувал аваз (а дереда машиндин рехъни са шумуд чкадилай уьцIенва), гьелелиг «Мацар-Ахцегь» цин турбадин кьилин имарат къайдада хтунив эгечIиз жезвач. Жемят «Лекье дере-Ахцегь» цин турбадин ва кьилди къуйдин целди таъминарзава. Бязи магьлейриз УЖКХ-дин машиндалди яд тухузва. Яшайишдин кIвалерин къавар ханвай инсанриз райондин игьтиятлувилин фондунай ва бюджетдинбур тушир чешмейрай куьмекзава. Гъилевай гьафтедин эхирдалди районда Интернетдин алакъадин месэлани гьял хъийида. Галатун тийижиз кIвалахзава. Аферин зегьмет чIугвазвай ксариз!
Дашдемир Шерифалиев
