Гъалибчияр тайинарна
Алатай гьафтеда Махачкъалада, нинийрин театрдин майдандал, республикадин «Ватан хуьзвайбуруз бахшнава» конкурсдин гъалибчийриз шабагьар гунин шад мярекат гегьеншдаказ кьиле фена. И конкурс РД-дин Кьил Сергей Меликован теклифдалди ЧIехи Гъалибвилин 80 йис тамам хьуниз талукьарна тешкилнавай. Важиблу, машгьур и конкурсда республикадин вири пипIерай тир 4000-далай гзаф аялри иштиракна.
Конкурс пуд номинациядикай ибарат тир: «Гъалибвилин сес» (дяведин манияр), «За Гъалибвилин шикил чIугвазва» (шикилар), «За дамахзава, за квез суьгьбетда» (авторвилин шиирар).
Мукьуфдивди хкягъайдалай кьулухъ жюриди гъалиб хьайи 45 касдин тIварар кьуна - абуру яратмишунин ва ватанпересвилин виниз тир дережа къалурнавай. Идалайни гъейри, конкурсдин сергьятра аваз, махсус номинацийра (гьа жергедай яз, дяведин махсус серенжемдиз (СВО) талукьарнавай, гьакIни «Тамашачийрин рикIиз хуш хьайибур»), гъалиб хьайи 13 кас хкяна.
[caption id="attachment_408362" align="aligncenter" width="720"]
С. Асланова муаллим
З. Саидовадихъ галаз[/caption]
Шабагьар вахкунин шад мярекатда РД-дин Кьил Сергей Меликова, образованидин ва илимдин министр Ягья Бучаева, культурадин министр Зарема Бутаевади, Дагъустандин писателрин союздин председатель Марина Агьмедова-Колюбакинади, «Ватан хуьзвайбур» госфондунин регьбер Идрис Къурбанова ва са жерге маса пешекарри, жемиятдин векилри иштиракна.
«Къе чна республикадин «Ватан хуьзвайбуруз бахшнава» конкурсдин нетижаяр кьазва ва мад сеферда чи ата-бубайрин игитвилер рикIел хкизва. Куь кIвалахар - шикилар, шиирар, манияр - ибур алай аямдин жегьилри яргъал тир а вахтарин вакъиаяр гьикI гьиссзаватIа, абуруз гьихьтин мана гузватIа, рикIив агудзаватIа къалурзавай гьахъ-гьисаб я лагьайтIа жеда», - лагьана республикадин Кьили. Ада кьетIендаказ къейд авурвал, шабагьар гунин мярекат нинийрин театрда кьиле тухун дуьшуьшдин кар туш: ада хабар гайивал, дяведин йисара гьа ина хатасуз чкадиз куьчарнавай 3187 ва 5061-нумрайрин госпиталар ачухнавай. Театрдин дарамат региондин тарих патал важиблу памятник яз кьабулнава. Сергей Меликова конкурсдин иштиракчийрин муаллимриз ва диде-бубайриз аялар ватанпересвилин руьгьдаллаз тербияламишунай чухсагъул лагьана.
Манияр лугьунин номинацияда гъалиб хьайибурув шабагьар - Зарема Бутаевади, «За Гъалибвилин шикил чIугвазва» номинацияда гъалиб хьайибурув Ягья Бучаева вахкана.
«Мектебра кIелзавай 10 агъзурдалай гзаф аялри «алатнавай зур йисан вахтунда ватанпересвилин жуьреба-жуьре конкурсра ва мярекатра иштиракна. Аялризни абурун муаллимриз рикIин сидкьидай чугъсагъул», - лагьана министрди.
Конкурсдин иштиракчийриз Дагъустандин Кьилин тIварцIихъай рикIел аламукьдай пишкешар, дипломар, сертификатар гана.
Мегьарамдхуьруьн райондин администрацияди кьетIен дамахдивди къейдзавайвал, республикадин конкурсдин шабагьар къачурбурун арада райондай тир аяларни ава: Билбилхуьруьн юкьван мектебдин ученица Асланова Саида Сабировна ва Советский хуьруьн мектебда кIелзавай Гьабибова Хадижа Бедирхановна. Абурун бажарагъдиз ва Ватандин ЧIехи дяведин игитрин къаматриз вафалувилиз жюриди виниз тир къимет гана. Ида муаллимри кьунвай рекьин дуьзгуьнвал, жегьил-жаванри ватанпересвилин тербиядихъ галаз алакъалу ихьтин мярекатра иштиракунин важиблувал мад сеферда къалурзава.
Саида Мурадова