3-февралдиз  Дербент райондин Белиж поселокда субботник кьиле тухвана. Ана поселокдин чlехи классра кlелзавай аялри, муаллимри ва бязи агьалийри иштиракна.

Пландин бинедаллаз поселокда кардик квай гьар са школадихъ зирзибил кlватl­дай куьчеяр галкlурнавай. И сеферда Г.Лезгинцеван тlварунихъ галай школадин, Белиждин гимназиядин ва 3-нумрадин СОШ-дин чlехи классра кlелзавай аялар  ва муаллимар поселокдин паркуна кlватl хьанвай. Иниз атайла, акl хьана хьи, на лугьуди, чун зирзибилдин майдандиз ухшар авай чкадиз акъатнава.

Поселокдин администрациядин къуллугъчийри субботникдиз атанвайбур зирзибил кlватlдай пакетралди ва бегьлейралди таъминарна. Кlва­тlай зирзибил хъуртал тухудайвал КамАЗ машинни кардик квай.

Субботник кьиле тухузвай парк СССР-дин девирда “СССР-дин 50 йис” тlвар алай совхозди кутурди тир. Гьукумат чкlай­­далай кьулухъ паркуниз килигдай кас хьанач. Поселокдин администрацияди анаг къайдадиз гъун патал вахт-вахтунда субботникар тешкил­завай­тlа­ни, паркунин сергьятар авайвал ракьун тlва­ла­рикай авунвай жу­гъунни чlугу­натlани, “Совхоз” микрорайондин агьалийри чпин зирзибил мад гьаниз гадарзавай, бязи чкайрилай янавай жугъундин тlва­ларни чуьнуьхнавай.

Субботникда иштиракзавай поселокдин кьил Рамиз Гьабибулаевахъ галаз хьайи суьгьбетдай малум хьайивал, парк аваданламишунин мураддалди ам Федеральный моно-шегьеррин программадик кутадай мумкинвал  хьанва. Парк саки 2 гектар чилел ала. А программадик кутун патал сифте и чилиз “къацу чар” авуна кlан­зава. Ахпа лазим чарар мадни гьазурна, кlвалах давамардайвал я. Федеральный программадин истемишунрай 2 га чилел алай паркар — “сквер” программадик, 2 гектардилай гзаф авайбур “парк”  программадик акатзава. Алай вахтунда паркуна кьурай тарар гзаф ава, кул-кусар экъечlнава.

Абур атlана, кlватlна акъуддай са ­субботник къведай сеферда агьалийриз  эвер гана тухуда. Михьи авурла, иниз экверни гъида, ацукьдай куьсруьярни эцигда, ­жу­гъун аламачир чкайра ам туькIуьр хъийида.

Субботникдин иштиракчийри паркунай кьве КамАЗ машин ацlай зирзибил кlватl­на. Аялрилай ва муаллимрилай гъейри, ина поселокдин кьиле авай ксари лап гзаф ва  чиркин зирзибил кlватl хьанвай  чкаяр михьун патал рабочиярни кьунвай. Школайрин коллективри чпиз къалурнавай участокрани активнидаказ кlвалах­на. Икl, абуру поселокдин Загьир Арухован, генерал Тагьир Гьажиеван тIвару­нихъ галай ва маса куьчейрайни зирзибил кlватl­на, михьивилер авуна.

Вирида гьакъисагъвилелди зегьмет чlугуна.  Р.Гьабибулаева вири коллективриз чухсагъул малумарна.

Сулейман Ахтынский