Мукьвара Махачкъалада кардик квай “Мавел” чапханада кьетlен бажарагъ авай шаир ва публицист Мердали Жалилован къелемдикай хкатнавай “Фиярикай риваятар” ктаб чапдай акъатна.
РФ-дин писателрин ва журналистрин союзрин член, РФ-дин ва РД-дин медениятдин лайихлу работник, Гьажибег Гьажибегован, Мегьамед Гьажиеван тlварарихъ галай ва “Дагъустандин къизилдин къелем”, “Къизилдин лекь” премийрин лауреат тир М.Жалилован къелемдин бегьерлувални хцивал, кьетlенвални итижлувал икьван чlавалди чапдай акъатнавай жуьреба-жуьре ктабри успатзава. Инал завай кlелчийриз фадлай таниш тир “Гафунин майданар”, “Къацу къашар”, “Билбил базардал”, “Ирид лагьай мертебадай”, “Сергьятдал”, “Кьепlирви Жавид”, “Машмаш тарак”, “Къенин югъ”, “Халкьдин духтур” ва хейлин маса ктабрин тlварар кьаз жеда.
“Фиярикай риваятар” ктаб тlвар-ван авай юрист, Дагъустандин Верховный суддин судья Зият Бедирович Седрединован 70 йисан юбилейдихъ галаз алакъалу яз чапдай акъуднава. Авторди вичи Фиярин хуьруькай, агьалийрикай жуьреба-жуьре йисара кхьенвай очеркрикай, шииррикай, шикилрикай менфят къачунва.
Авторди ктабдиз ихьтин тlвар гунни дуьшуьшдин кар туш. Гьакъикъатдани, ктабдин “Риваятрин” сагьибар” тlвар ганвай кьиле гьатнавай очеркар риваятриз ухшар я. Кьетlен чка ктабдин кьилин игит тир баркаллу ватанэгьли Зият Седрединован лайихлувилерикай, адан тухумдикай кхьенвай очеркри кьунва. Мадни, жуьреба-жуьре хилера лайихлу дережаяр къазанмишнавай фиявияр тlимил авач: Ашукь Ширин, Тарлан Мамедов, Нисрет ва Къудрат Исмаиловар…
Ктабда икьван чlавалди санани чап тахьанвай ашукь Ширинан манийризни чка ганва. “Рекьерин къейдер” тlвар ганвай кьил маракьлу, куьруь эсеррикай ибарат я.
Шак алачиз, ктабда и ажайиб хуьруьн тарихдикай, баркаллу ватанэгьлийрикай малуматарни делилар, итижлу мезелияр, къейдер гьатнавайвиляй ам неинки фиявийриз, гьакl гьар са лезгидизни хуш жеда.
Куругъли КЪАЛАЖУХВИ
