Адыгеяда регионрин уртах «Зи кIани край» выставка кьиле фена. Ана культурадин деятелри, гьукумдин органрин векилри, шикилчийри, студентри, СМИ-рин векилри иштиракна. Шикилрин выставкадин тешкилатчийри къейд авурвал, ам Россиядин кьиблепатан тIебиатдин надир гуьрчегвилиз талукьарнава ва ада тамашачияр уьлкведин гуьрчег пипIериз вилералди сиягьатдиз тухузва.
Конкурсда Кьиблепатан ва Кеферпатан Кавказдин федеральный округрин 11 субъектдай тир саки 70 шикилчидин 400-дав агакьна яратмишунрин кIвалахар къалурзавай. Абурукай финалдиз 54 автордин лап хъсан 160 кIвалах хкяна.
Къейд ийин, конкурсда чи баркаллу ватанэгьли, Россиядин фотохудожникрин союздин член Юсиф Саркаровани иштиракна, ам финалдиз акъатна. Чна адаз и агалкьун рикIин сидкьидай мубаракзава. Экспозициядик Юсиф Саркарован агъадихъ галай кIвалахар кутунвай: «АтIугъай крайда», «Къванцин дестекар», «Лув гун», «Циферин юкьва».
Выставкада тафаватлу хьайибурув шабагьар Майкоп шегьерда авай РагъэкъечIдай патан музейда вахкуда.
М. Нариманов
