Дидевилин капиталдилай алава яз, алай йисуз яшайишдин са жерге такьа­тар артухар хъувунва. Госдумадин Председатель Вячеслав Володина вичин телеграм-каналда хабар гузвайвал, уьл­кведин Президентдин къарардалди яша­йишдин такьатар ва страховой пенсияр 9,5 процентдин артухар хъийида. Варз алат­на­ватIани, и цIийивал 1-январдилай къуватда гьатдайвал авун кьетIнава.

1-февралдилай са уьлкведай маса уьлкведиз куьч хьунихъ, чка дегишарунихъ галаз алакъалу сиясатдани нубатдин дегишвилер гьатнава. Къецепатай чи уьлкведиз атанвайбуру миграциядин къанунрал амал тавуртIа, абур элкъвена суьргуьн хъувунин къанунди кIвалахда. РФ-дин къанунрал амал тийизвайбур ва я уьлкведа амукьдай ихтиярар амачирбур чпин ватанриз хъфин лазим я. И серенжем хатасузвал мягькемарунин макьсаддалди кьилиз акъудзава.

Уьлкведиз къведайла ва я инай эх­къечIдайла къайдаяр чIурай дуьшуьшриз талукь яз административный жавабдарвал кардик кутазва.

Загранпаспорт къачун патал

Виликдай хьиз, исятдани чи уьлкведа загранпаспорт куьгьне ва цIийи жуьрединди туькIуьриз жезва. И документ къецепатан уьлквейра сиягьат авунал рикI алайбур патал важиблу я.

РД-дин кьилин МФЦ-дин пешекарри хабар гайивал, эгер мукьвал-мукьвал маса уьлквейриз физватIа ва я яргъалди къуватда амукьна кIанзавай паспорт лазим ятIа, цIийи жуьредин чешне хкягъун хъсан я. Загранпаспорт къачун патал ихьтин документар лазим я:

 РФ-дин паспорт;

 хайивилин гьакъиндай шагьадатнама (паспорт къачудай яшдив агакь тавунвайбуруз талукь я);

 госпошлина: куьгьне жуьрединди патал — 2 агъзур манат (14 йис жедалди яшара авайбур патал — 1 агъзур манат); цIийи жуьрединди патал — 6 агъзур манат (14 йис жедалди яшара авайбур патал — 3 агъзур манат);

 аваз хьайитIа, вахт акьалтIзавай загранпаспорт;

 эгер тIвар, фамилия ва я бубадин тIвар дегиш хьанватIа, гьа дегишвилиз талукь документ.

 военный билет ва я военный комиссариатдай приписной чар (18-30 йисан яшара авайбуруз талукь я);

 3,5 х 4,5 сантиметрдин пуд шикил.

Гьазур хьайи загранпаспорт иесидин гъилиз са вацралай къведа.

«Лезги газет»