Алкьвадар Гьасанан тIварцIихъ галай медениятдинни марифатдин маканди «Лезги газетдин» редакциядин ва Эминхуьряй тир меценат Шагьпаз Асаханован куьмекдалди Етим Эминан «РикIел гъваш» шиир кIелунай уьлкведин дережада аваз кьиле тухвай «Етим Эминан ирс» онлайн-конкурсдин нетижаяр кьуниз ва тафаватлу хьайибуруз пишкешарни дипломар гуниз талукь мярекат 23-декабрдиз Махачкъалада, Р. Гьамзатован тIварцIихъ галай милли ктабханада, кьиле фида.
Къейд ийин, Дагъустандин эдебиятдин классик Етим Эминан 185 йис тамам хьунин сергьятра аваз тешкилай онлайн-конкурс 15-декабрдиз акьалтIна. Ана уьлкведин жуьреба-жуьре районрин, шегьеррин мектебра (7, 8, ва 9-классра) ва вузра кIелзавайбуруз иштиракдай мумкинвал авай. Конкурс мектебра кIелзавайбурун ва вузрин студентрин кьилдин кьве номинациядикай ибарат тир. Санлай къачурла, иштиракайбурун кьадар 130-далай алатна.
Иштиракчийри шиирар кIелзавай вири видеороликар «Лезги газетдин» телеграм-каналда чапна. Абуруз редакцияда кIвалахзавай пешекаррикай ибарат жюриди къимет гуда.
Гъалибчияр ва хъсан чкаяр кьурбур патал гьар са номинациядай ихьтин пишкешар тайинарнава:
1-чкадай — 25 агъзур манат;
2-чкадай — 20 агъзур манат;
3-чкадай — 15 агъзур манат;
4-чкадай — 12 агъзур манат;
5-чкадай — 10 агъзур манат.
Пулунин пишкешрилай гъейри, тафаватлу хьайибуруз дипломар ва ктабар гуда.
Чи мухбир
