Международный дережадин «Устойчивое развитие горных территорий» форум Дагъустанда кьиле тухун дуьшуьшдин кар туш. Республикадин мулкарин саки са пай дагълух чкайри кьунва. Дагъустанвийрин пудай са пай дагълара авай хуьрера яшамиш жезва.
Сергей Меликова вичин телеграм-каналда хабар гузвайвал, хуьрера авай инсанриз куьмек гунин важиблувал кьатIана, Дагъустанди Россияда сифтебурукай сад яз дагълух мулкариз талукь къанун кьабулна. Хуьруьн чкада карчивал, майишатар вилик тухузвай кьилдин программани кардик ква.
С. Меликова гьакIни къейдзавайвал, и йикъара регионда кьиле физвай форумдин сергьятра аваз, дагълух мулкар вилик тухуниз талукьарнавай хейлин месэлаяр веревирдда. Абур гьялунилай дагъвийрин яшайишдин шартIарни аслу жеда.
Сергей Меликова международный дережадин форум кьиле тухун патал Дагъустан хкягъунай СНГ-дин Межпарламентский Ассамблеядин генсек Дмитрий Кобицкийдиз сагърай лагьана.
«Лезги газет»
