Дуьньядин хабарар
Махсус серенжемдикай
Россиядин оборонадин министерстводи 20-сентябрдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 674 самолет ва 284 вертолет, зенитдин ракетайрин 672 комплекс, пилот галачиз лув гудай 241996 аппарат, 30971 танк ва дяведин маса машинар, РСЗО-дин 1778 машин, артиллериядин ва маса 36505 яракь, дяведин махсус 72371 автомашин тергна.
Еке вакъиайрикай хабар гана
Америкадин регьбер Дональд Трампа мукьвара Ирандин гьакъиндай къарар кьабулда. Ихьтин фикир «Fox News» телеканалдин журналистди лагьана.
«Зун исятда президент Трампахъ галаз Ирандин гьакъиндай рахана. Хиве кьурвал, ада исятда къарар кьабулунал кIвалахзава ва мукьвара чIехи вакъиаяр жеда», – лагьана журналистди.
Адан гафаралди, Лацу кIвалин кьили пуд фикир малумарнава: Иран тергун, адаз «экономикадин жигьетдай китIидай» мумкинвал гун ва я анихъ галаз икьрар кутIунун.
Са тIимил чIав идалай вилик арабрин ва Ближний Востокдин крарин патахъай Трампан меслятчи Массад Булоса Америкадин регьберди Ирандихъ галаз авай къалмакъал фад-фад куьтягьунин месэладал кIвалахзавайди къейднай.
Иранди жаваб гуда
Эгер США-ди мад Ирандал вегьедай къарар кьабулайтIа, Америкадин итижар хуьзвай, Ближний Востокда авай вири базаяр Ирандин яракьлу къуватри яда. Ихьтин малумат Ирандин яракьлу къуватрин кьилин «Хатам аль-Анбия» штабди малумарнава.
«Чна тагькимарзава: эгер США-ди Ирандиз акси яз гъалатIдиз рехъ гайитIа, регионда вири базаяр датIана ва таъсирлудаказ ядай макьсадриз элкъведа», – лагьанва Ирандин гостелерадикомпанияди раижнавай малуматда.
Штабди гьакIни Ближний Востокдин уьлквеяр тагькимарнава хьи, эгер США-дин аксивилериз шерик хьайитIа, абурувай Ирандин яракьлу къуватар кисна акъвазуник умуд кутаз жедач. Ирандин штабди малумарнавайвал, Ближний Востокдин бязи уьлквейрин разивилелди Европадин уьлквейрикай сана кьиле фейи совещанидал мад Ирандиз акси женгер давамар хъувунин къарар кьабулнава.
США-дини Израилди Ирандин объектриз 28-февралдиз ягъунар кьаз башламишнай. Ирандини ягъунриз ягъунралди жаваб гана. Тегерандини Вашингтонди 18-июндиз къалмакъал куьтягь хьанвайвилин гьакъиндай меморандумдал къулар чIугуна. Амма Америкадин кьушунри, меслят чIуруналди, июлдиз Ирандиз са шумудра ягъунар кьуна.
Къурхулувал авач лугьузва
КНДР-ди кьиле тухвай ракетаяр ахъаюнин серенжем США-дин гьукумдарри чпин уьлкведиз ва амадагриз къурху гузвай гьерекат яз гьисабзавач. Ихьтин фикир, «РИА Новости» чешмеди хабар гузвайвал, США-дин яракьлу къуватрин Тихий океандин командованиди малумарна.
Алатай гьяддиз Кьиблепатан Кореядин «Ренхап» агентстводи КНДР-ди Японский гьуьлуьн терефдихъ кьве ракета ахъаяйдакай хабар ганай. Кьве дуьшуьшдани ихтилат мукьвал мензилдиз фидай баллистикадин ракетайрикай физвай. Сад лагьай ракета тахминан 450 километрдиз фена, кьвед лагьайди – 600 километрдилай артух.
«И вакъиа себеб яз США-дин аскерар ва мулкар патал са къурхулувални авач», – къейднава США-дин ВС-дин командованиди «Х» соцсетда кхьенвай малуматда.
КIеве гьатунрикай
Дезертирвал ва армиядикай кьил къакъудзавайбур себеб яз ВСУ бегьем кIевера гьатзава. Ихьтин фикир Чикагодин университетдин профессор Д. Миршаймера интернетдин майданра раижна.
Адан фикирдалди, арадал атанвай гьал хъсанвилихъ дегишарун патал Киевдилай саки са затIни алакьдач. «Санлай къачурла, ашкара я хьи, Украина и къалмакъалда гъалиб жедай гьалда авач», – лагьана ада.
Алава хъувурвал, Украинадин сиясатди уьлкве барбатI хьунал гъана. Къейдзавайвал, Киевди гележегдани Европадихъ галаз алакъаяр сихдиз хуьн давамарда, «европавийриз лагьайтIа, аквадай гьаларай, Украина Россиядиз акси яз гележегдани ишлемишиз кIан жеда».
Виликдай Миршаймера лагьанай хьи, эгер Одесса кьуртIа, Украинадиз гьуьлуьхъ галаз авай алакъа саки амукьдач ва ида ам экономикадинни военный жигьетрай зайифарда.
"Лезги газет"