Дуьньядин хабарар
Къудратлу кIватIал
Россиядин Президент Владимир Путина Нью-Делида кьиле фейи БРИКС-дин саммитдин эхиримжи мярекатдал къейд авурвал, дуьньяда и кIватIалдин кIвалахдиз артух дикъет гун давам жезва. Адан гафаралди, БРИКС вири уьлквейрихъ сад хьтин, барабар ва сергьят алачир мумкинвилер хьунихъ, экономикадинни яшайишдин рекьяй сад хьиз виликди финихъ ялзавай кIватIал я. Идакай «РИА Новости» чешмеди хабар гузва.
РикIел хкайвал, дуьньяда къецепатаз метягь агакьарунин жигьетдай саки кьудай са пай БРИКС-дин уьлквейрал ацалтзава. Адак квай государствойра халкьдин кьадар артух хьун датIана давам жезва, къенепатан базарар мягькем жезва, санайидин, технологийрин, финансрин ва илимдинни тагьсилдин къудратлу центраяр арадал гъанва, алай аямдин улакьрин, энергетикадин ва рекъемрин къурулушар кардик кутунва. КIватIалдин къенепатан алишвериш 1,2 триллион доллардив агакьнава.
ОАЭ гьазур я
Абу-Дабидин принц Халед Аль Нахайяна Россиядин Президент Владимир Путинахъ галаз рахай вахтунда ОАЭ Украинадин жигьетдай рахунар кьиле тухудай майдан тешкилуниз гьазур тирди тестикьарна. «РИА Новости» чешмеди хабар гузвайвал, ихьтин фикир Россиядин Президентдин куьмекчи Юрий Ушакова малумарна.
Къейд ийин, Халед Аль Нахайянанни Владимир Путинан арада суьгьбет БРИКС-дин саммитдин сергьятра аваз кьиле фена.
Гьакъикъи нетижаяр кIанзава
Индиядин премьер-министр Нарендра Модиди БРИКС-дин саммит адан иштиракчийриз арадал атай икьрарар гьикъикъи краралди мягькемаруниз эвер гуналди акьалтIарна. Адан гафар «РИА Новости» чешмеди раижзава.
«БРИКС-ди пуд лагьай цIуд йисаз кам къачузва. Гила дуьньяда чавай неинки фикирар ва мажбурнамаяр, гьакIни гьакъикъи нетижаяр гуьзетзава. Инанмиш я хьи, виридан къуватралди чна и умудар кьилиз акъатдайбуруз элкъуьрда», – малумарна премьерди мярекатдин эхиримжи рахунра.
Къейд ийин, БРИКС-дин ХVIII саммит 12-13-сентябрдиз Нью-Делида Индиядин председателвилик кваз кьиле фена. Гуьруьшдин нетижада регьберри кIватIалдин уьлквейри гележегда санал кIвалахунин хилер тайинарзавай Нью-Делидин декларация кьабулна.
Трампан истемишун
США-дин президент Дональд Трампа Владимир Зеленскийдиз Россиядин НПЗ-риз (нафт гьялзавай заводриз) ягъунар кьун акъвазаруниз эвер гана. Идакай 13-сентябрдиз «РИА Новости» чешмеди хабар гана.
«Зеленскийди са кар авуна кIан жеда: Россияда дизелда кудайдан производство къайдадикай хкудун акъвазарун. <...> Ида дизелда кудайдан кьитвал арадал гъизва. Им Ближний Востокдихъ галаз алакъалу туш – им Россиядинни Украинадин къалмакъал себеб яз арадал къвезва», – лагьана ада Ирландияда авайла журналистриз.
Дережа агъуз аватнава
Франциядин президент Эммануэль Макронан дережа садрани тахьа жуьреда агъуз аватнава. Идакай «Tribune Dimanche» чешмеди хабар гана.
Къейдзавайвал, Макронан президентвилин кIвалахдиз анжах 16 процент французри разивилин къимет гузва. Президентдин къуллугъдал алаз хьайи вири муддатда (2017-йисалай инихъ) агьалийрин патай ам икьван чIавалди ихьтин татугай дережадиз садрани акъатначир. Хабарар кьунин серенжемда иштиракайбурукай 81 процентди уьлкведин регьбердиз нагьакьан къимет гана. Гьа са вахтунда премьер-министр Себастьян Лекорнюдилай 20 процентди разивал къалурна.
Орбанан женг
Венгриядин виликан премьер Виктор Орбана вич Петер Мадьяр кьиле авай цIийи гьукуматдиз акси сиясатдин женг давамар хъувунив эгечI хъийизва лагьана.
«Чун сабурлу тир, мумкин я, гьатта герек тирдалай артухни сабурлу тир… Вад варз алатна. ИкI давам хьана виже къведач… Бегьле хкажун ва бягьс чIугун герек я», – лагьана Орбана, хабар гузва «РИА Новости» чешмеди.
"Лезги газет"