184 беспилотник яна

7-октябрдиз РФ-дин оборонадин министерстводи хабар гайивал, йифен вахтунда чи ПВО-дин къуватри ВСУ-ди Россиядин мулкарихъ ахъаяй  184 беспилотник яна.

Кьилди къачуртIа, 62 БПЛА — Курскдин областда, 31 — Белгороддин, 30 — Нижний Новгороддин, 18 — Воронеж­дин, 6 — Липецкдин, 5 — Калугадин, 4 — Туладин, 13 — ЧIулав гьуьлел, 3 – Ростовдин, 3 —  Рязандин, 2 — Брянскдин, 2 — Орёлдин, 2 — Крымда, 2 — Москвадин областда (гьа жергедай яз Москвадихъ атай садни), 1 — Волгограддин.

Украинади яшайишдин объектрал ийизвай гьужумриз жаваб яз, Россияди дуьм-дуьз ягъунар кьадай цавун, гьуьлуьн ва чилин яракьрин куьмекдалди анжах военный объектрал, яракьар гьазурзавай карханайрал гьужумзава.

Гьа са вахтунда Россиядин Яракьлу Къуватри Плещеевкадин районда Украинадин кьушунри беспилотникрин кIвалах идара ийизвай 2 пункт тахьай мисална.

РФ-дин оборонадин министерстводи 7-октябрдиз малумарай делилралди, оперативно-тактический авиациядин, пилот галачиз лув гудай аппаратрин куьмекдалди Россиядин Яракьлу Къуватри Украинадин кьушунар таъминарзавай са шумуд хилез ягъунар кьуна. Анрик энергетикадинни улакьрин къурулушар, кудай затIарин гьамбарханаяр акатзава. Идалайни гъейри, Украинадин кьушунрин дестеяр, къецепатан уьлквейрай гьакъидихъ кьунвай аскерар вахтуналди акъвазнавай 148 райондиз ягъунар кьуна.

ТIар жедайвал жаваб гуда

Госдумадин оборонадин рекьяй комитетдин кьил Ан­дрей Картаполова малумарайвал, Украинадин кьушунри Запорожьедин атомный электростанция  (ЗАЭС) ягъунай Россияди Киевдиз «гзаф тIар жедай» саягъда жаваб хгуда.

«Чна Киевдин режимдиз гзаф тIар жедай чкайриз ягъунар кьада. Гьазурвилер аквазвай, яракьар арадал гъизвай, логистикадиз ва парариз талукь чкайриз. Ихьтин жуьреда кьазвай гьар са ягъуни душмандин яракьар тIимиларзава», — лагьана А. Картаполова.

Алава хъувурвал, Россияди Украинадин атомный электростанцияр ядач, гьикI хьи, и кар ислягь агьалияр патал хаталу я. ЗАЭС-дал гьужумар авуналди, Киевдиз гуманитарный жигьетдай четин гьалар арадал гъидай къаст ава.

Къейд ийин, СВО кьиле тухуз эгечIайдалай инихъ Украинадин кьушунри ЗАЭС энергиядалди таъминарзавай гзаф вольтрин къецел патан 10 линиядикай 8 тергнава. Идакай идалай вилик Крымдин кьилин меслятчи, атомный энергетикадин пешекар Ренат Карчаади лагьана. Адан гафаралди, атомный электростанция­да мусибатдин гьалар арадал атайтIа, Украинадин терефди Москва тахсирлу яз къалуруник умудар кутазва.

Сиясатдин кIакI

Франциядин министр А. Бержеди малумарайвал, уьлкведин президент Э. Макроназ исятда авай сиясат­дин четин шартIара къуллугъдилай элячIдай фикир авач. Идакай «TF1» чешмеди хабар гузва.

Адан гафаралди, Макрон вичин къуллугъдал демок­ратиядин рекьелди хкянава. Чешмеди тестикьарзавайвал, уьлкведа кьуд сеферда премьер-министр дегиш хьуни гьалар муракаббур тирди къалурзава.

Франциядин сиясатчи Ж.Меланшонан фикирдалди­, и уьлкведа арадал атанвай сиясатдин кIакI арадай акъу­дун патал авайди са рехъ я — Макрон отставкадиз фин.

Япония хаталу яз гьисабзава

Дуьньядин сиясатда США-дин кьилин бягьскарар­, адет яз, Россияни Китай яз гьисабзавай. Москва — ядерный еке мумкинвилер себеб яз, Пекин — экономикадинни технологиядин еке мумкинвилер себеб яз. Амма Китайдин «Sohu» порталдин аналитикрин фикирдалди, фадлай США-дин амадаг яз гьисабзавай Япония гила Вашингтондин кьилин бягьскардиз элкъвезва.

«Лезги газет»