Гатфар алукьайла, цIаяр кьунин вилик пад кьадай къуллугъри агьалийриз кьурай векьерик ва зирзибилдик цIай кягъ тавуниз эвер гузва. ЧIуру нетижайрал гъун тавун патал герекзавайди анжах са шартI я — мукъаятвал квадар тавун. Гатфариз, гатуз кьурай векьерик, пешерик цIай кягъун сифтедай еке хата авачирди хьиз аквада. Гзафбуру им хийирлу кIвалах язни гьисабзава, гьикI хьи, адан чIуру таъсирдикай фикирзавач. ЦIу вичин хурук акатай набататар, гьашаратар, гьайванрин ва къушарин шарагар тергзавайди хьиз, чилин винел къатни кузвайди, ам арадал хкун патал агъа кIан 7 йис лазим къвезвайди чизвач. РикIел хуьх: цIай хкадарунилай адан вилик пад кьун регьят я.
Россиядин МЧС-дин Дагъустанда авай Кьилин управлениди агьалийриз гзаф мукъаят хьуниз эвер гузва. Зирзибилдиз ва кьурай векьериз цIай ямир. Спичкадин цIай кумай кьалар ва пIапIрусрин кьатIар гадар тавун, са гафуналди, цIаяр кьуникай хуьнихъ элкъуьрнавай къайдайрал кIевелай амал авун тIалабзава.
Чна виликдайни хабар гайивал, цIув ва хаталувал авай маса чешмейрив мукъаятсуздаказ эгечIунай РФ-дин Кодексда (20.4-статья) административный жавабдарвилиз чIугун ва жерме авун къалурнава. Агъадихъ галай кьадарда:
= агьалияр 5000-далай 15 000 манатдал кьван;
= жавабдар къуллугърал алай ксар 20 000-далай 30 000 манатдал кьван;
= карчивилел машгъул жезвайбур (юридический лицо тушиз) 40 000-дилай — 60 000 манатдал кьван;
= тешкилатар (юридический лицо) 300 000-далай 400 000 манатдал кьван.
Тамар цIаяр кьуникай хуьнихъ элкъуьрнавай къайдайрал амал тавурла, жерме ийида:
= агьалияр — 15 000-далай 30 000 манатдал кьван;
= жавабдар къуллугърал алай ксар — 30 000-далай 50 000 манатдал кьван;
= тешкилатар (юридический лицо) 100 000-далай 400 000 манатдал кьван.
Къейд. РФ-дин КоАП-дин винидихъ къалурнавай статьядал (8.32 — «Тамари цIаяр кьунин хатасузвилин къайдаяр чIурун») асаслу яз, юридический лицо тушиз, карчивилел машгъул ксар, юридический лицояр хьиз, еке кьадарда жерме ийида.
Атикат Гьасанова,
Махачкъаладин гуьзчивалдай ва вилик пад кьунин
кIвалахдин 1-нумрадин отделдин дознаватель
