Кьве югъ вилик «Дагъустан» РИА-да РД-дин Халкьдин Собранидин депутат, «Россиядин рекьин тийир полк» ООД-дин региондин штабдин регьбер Марат Алияровахъ, РД-дин жегьилрин крарин рекьяй министр Камил Саидовахъ ва республикадин «ДагПатриотЦентр» ГБУ-дин директор Рамазан Мегьамедовахъ галаз журналистрин гуьруьш кьиле фена.
Малум хьайивал, ЧIехи Гъалибвилин юбилейдин ва Ватан хуьзвайбурун йисуз республикада ватанпересвилихъ галаз алакъалу вишелай виниз мярекатар кьиле тухвана. Анра 580 агъзурдав агакьна жегьилри иштиракна. Республикада волонтеррин кьадар артух жезва. Исятда абурун кьадар 200 агъзурдалай алатнава. Жегьилрин крарин рекьяй министерстводи саки вири мярекатар ватанпересвилин лишандик кваз тешкилзава. ГьикI лагьайтIа, акьалтзавай несилдиз ватанпересвилин тербия гун девирдин истемишун я.
М. Алиярова лагьайвал, «Рекьин тийир полк» гьерекатдин цIуд йис хьанва. Гила адан метлеб мадни гегьеншди, важиблуди я. Ам анжах са Гъалибвилин сувариз тухузмач. «Рекьин тийир полк» гьерекатди йисан вири вахтунда кIвалахда. Адан хиве гзаф везифаяр гьатзава. Дявейрин ветеранрихъ галаз алакъа хуьн, абурун тежрибадикай, викIегьвилерикай акьалтзавай несилдиз ватанпересвилин тербия гунин карда менфят къачун, гел галачиз квахьнавай аскерар жагъур хъувун… 2026-йисуз вири уьлкведа «Рекьин тийир полкунин» мярекатар тухуда.
Дагъустандин жегьилри дяведин махсус серенжемдин иштиракчийриз куьмек гунин кардани гьевесдивди иштиракзава. Абуру чи аскерриз герек вад тонн шейэр кIватIна ва СВО-диз рекье туна.
Нариман Ибрагьимов
