Селлерилай кьулухъ

Селлер атайдалай кьулухъ Дагъус­тандин 10 районда газдиз талукь къурулуш цIийи хъийида. Идакай «Дагъустан патал газ» телеграм-каналди хабар гузва­.

Чешмеди къейдзавайвал, чимивилел­ди таъминардай сезон алукьдалди­, рес­публикадин районра газ агакьардай­ къурулушдин 51 объект цIийикIа туькIуь­ру­нин ва бинедилай ремонт авунин кIва­лахар кьиле тухуда. Абур Кьурагь, Ахцегь, Бабаюрт, Тарумовка, Ботлих, Гергебиль, Гуьмбет, Къайтагъ, Табасаран ва ЦIумада районра кьилиз акъудда.

Газдин компанийрин директор Ризван Мурадован гафаралди, газдин турбаяр цIийи схемайрай, бязи кьилдин учас­токар цIийи рекьерай тухуда. И карди гьавадин пис шартIара, четин чкайрай газ агакьардай къурулушдин дурумлувал артухарда.

Пар артух жезва

Зегьем йикъар алукьайла, Дагъус­тандин электросетрал акьалтзавай пар са шумуд сеферда артух жезва. Кондиционерри, вентиляторри, холодильник­ри токдин симериз ва трансформаторрин подстанцийриз лап екез таъсирзава. Идакай РД-дин энергетикадин ва тарифрин министерстводин телеграм-каналди раижзава.

Чешмеди ихьтин вахтунда электроэнергия хкатзавай дуьшуьшар вучиз арадал къвезватIа, гьадакай хабар гузва. Къейдзавайвал, электросетар тайин­ гужлувилиз гьисаба кьунва­. Агьалийри вирида санлай энергия гзаф серфдай кондиционерар, парталар чуьхуьдай машинар, уьтуьяр… кутур вахтунда, акьалтзавай пар «ихтияр авай кьван» (допустимый) рекъемрилай алатзава. И чIавуз «хуьдай» (защитный) система вич-вичелай кардик акатзава. Ада электроэнергия хкудзава - тадарак кьадардилай артух ифинин ва цIай кьунин вилик пад кьун патал.

Чешмеди гьа са вахтунда ихьтин чIавуз гьам жуваз, гьамни жуван къуншийриз менфятлу меслятарни къалурзава.

- Электроэнергия гзаф ишлемишдай вахтара (йикъан сятдин 12-далай нянин 5-далди (12:00 – 17:00) ва нянин сятдин 7-далай йифен сятдин 11-далди), мумкинвилиз килигна, энергия гзаф серфдай приборар ишлемишун сергьятламиша.

- Са розеткадик гзаф гужлу са шумуд прибор кутамир.

- КIвале шнуррин (проводка) гьал ахтармиша.

- Жува-жуваз туькIуьрнавай ва ахтармиш тавунвай тадаракар ишлемишмир.

Эквер хкатайтIа...

Ихьтин дуьшуьшра энергетикриз и месэладикай хабар жезва ва ам арадал хкун патал абуру кIвалахзава. Тадарак (оборудование) къайила электроэнергия кухтада.

Электроэнергия хгунин тахминан вахт 15 декьикьадилай 60 декьикьадал кьван я (тадаракдал ифин акьалтунин дережадилай аслу яз).

Электроэнергиядалди таъминаруниз­ талукь месэладай агьалийривай югъ­­ди-йифди кIвалахзавай ифей линиядиз­ зенг ийиз жеда – 8-800-220-0-220 ва я 220 (пулсуз).

Гьа са вахтунда винидихъ тIвар кьур телеграм-каналди хабар гузвайвал, ихьтин кар рикIел хуьн важиблу я: яшайишдин гьар са дарамат­дин электросетар тайин гужлувал патал гьисаба кьунва. Дараматда санлай кIва­­лахзавай тадаракар гзаф хьайила, электроэнергия ишлемишунин дережа кьадардилай алатайла, сетда напряжение­ агъуз аватзава. И делилди кIвале ишле­мишзавай техникади кIва­ла­хунин ­къайда чIур хьунал гъизва. Генани хаталу кар ам я хьи, артух пар акьалтуникди проводкаяр лап ифин, абур кун, цIай кьун ва маса дуьшуьшар арадал атун мумкин я.

ЦIийи рекъемар

Дагъустанда селлер атуникди зиян хьайи 76 агъзур касди, санлай къачурла, 2,8 миллиард манатдин кьадарда аваз пулдин такьатар къачунва. Идакай РД-дин Гьукуматдин телеграм-каналди хабар гузва.

Къейдзавайвал, 24-июлдин делилралди, яшайишдин рекьяй куьмек яз пулдин такьатар 76 агъзур агьалидиз ганва, санлай къачурла, абурун кьадар 2,8 миллиард манатдиз барабар хьанва.

Идалайни гъейри, регионда яшайишдин кIвалериз зарар ва абур пуч хьунай пулдин такьатар гун патал арзаяр кьабулун давам жезва. Алай юкъуз 2 238 арза кьабулнава.

Хабар гузвайвал, вацран эхирдалди арзаяр кьабулунин ва абуруз килигунин кIвалах акьалтIарун пландик кутунва. Ахпа пулдин такьатар гунин серенжем гатIунда. 

Гьазурайди – Муса Агьмедов