Лезги районра мискIинар авачир, мискIинри кIвалах тийизвай хуьрер къенин юкъузни ава. И четин месэла хуьруьн жемятди гьялун чарасуз я. ГьикI мискIин герек ятIа, гьакI ана кIвалахдай кIелнавай имамни хьун лазим я. Гьавиляй жегьилар Исламдин медресайриз рекье тваз жеда, месела, — Дагъустандин Огни шегьерда авай Ярагъ Мугьаммад эфендидин тIварцIихъ галай медресадиз.
Мукьвара СтIал Сулейманан райондин Асалдхуьре цIийи мискIин ачухна. Бубайрилай ирс яз амукьнавай мискIиндин дарамат ацахьнавай, туьхкIуьрдай гьалда амачир. Гила, шукур хьурай Аллагьдиз, Исламдихъ ва халкьдихъ рикI кузвай мусурманар себеб яз, Асалдхуьре вири шартIар авай мискIин арадал атанва. И кардик гзафбуру пай кутуна, эцигунрин кIвалахрин кьиле Гьажиханов Замир ва Мустафаев Мустафа акъвазна. ХандакIар ягъайдалай кьулухъ абуру хуьруьнвийрин куьмекдалди са метр кьван кьакьанвилиз цлар хкажна. КIвалахар давамарун патал такьатар куьтягь хьана. И арада, Аллагьди ракъурайди хьиз, Кьасумхуьруьн мис-кIиндиз лезги халкьдин кьегьал хва Алимирзе Хазаров атана ва вичиз са мискIин цIийикIа туьхкIуьр хъийиз кIанзавайдакай лагьана. Райондин имам Гьасан Амаханова адаз Асалдхуьре мискIин эцигзавайдакай ва ам куьмекдихъ муьгьтеж тирдакай хабар гана. А.Хазарова имамдин меслят кьабулна ва Асалдхуьруьн мискIин эцигун вичин хивез къачуна. Гьелбетда, ада и мергьяматлу кIвалахдик чпин пай кутаз кIанзавайбурузни а кар къадагъа авунач. Гьа икI, Къизляр раойнда авай Сарсар хуьряй тир Загьидин Кьасумова мискIиндин къав патал такьатар чара авуна. Заминулагь Мустафаева пулдин такьатралди куьмек гана. Гьелбетда, куьмекар гайибур гзаф хьана, амма макъалада чна анжах еке такьатар чара авурбурун тIварар кьунва. Амай вири кIвалахар Алимирзе Хазарова чара авур такьатрихъ авуна.
МискIин ачухуниз талукьарнавай мярекатда Кьиблепатан Дагъустанда РД-дин Муфтиятдин векил Гь.Гьажиева, Вини СтIалрин имам И.Гьамидова, Цмур хуьруьн имам А.Аливердиева, Герейханован хуьруьн имам А.Эминова, Асалдхуьруьн агъсакъал Къагьриман муаллимди, гьа и хуьруьн имам З.Гьажиханова ва масабуру иштиракна. Межлис райондин имам Гь.Амаханова кьиле тухвана.
Чи мухбир
