Ингье 2025-йис тарихдиз хъфиз са шумуд югъ ама. Йисан кьиляй-кьилиз газетдин чинра чна лезги халкьдин векилри — чи кьегьал рухвайри — къазанмишзавай агалкьунрикай кхьена. Абуру республикадин, уьлкведин ва международный спортдин кесерлу майданра кьиле тухвай акъажунрикай жезмай кьван виридакай хабарарни муштулухар гуз чалишмиш хьана. Чпин гъалибвилералди абуру неинки спортдин уьмуьрда лайихлу гел тазва, гьакIни акьалтзавай несилдиз сагълам уьмуьрдин яшайиш тухунин чешне къалурзава. ЦIийи йисан вилик муштулухар чахъ мадни ава…
ИкI, и йикъара Санкт-Петербургда ACBJJ (Absolute Championship Brazilian Jiu-Jitsu) — Россияда ва адалай къецени Бразилиядин джиу-джитсу (кимоно алаз ва кимоно алачиз) машгьурзавай международный тешкилатди — дуьньядин чемпионатдиз са шумуд уьлкведай тир викIегь спортсменар кIватIнавай. Тамам кьуд юкъуз абуру 14 гьасирдал чпин устадвал къалурна. Шадвилелди а кардикай хабар гуз кIанзава хьи, кесерлу и акъажунра чи миллетдин векилрикай са шумуда хъсан нетижаяр къазанмишна. Чемпионатдин сад лагьай юкъуз шуьтруь рангунин чIуларин сагьибрин арада грепплингдай (кимоно алачиз) кьиле фейи акъажунра Дербентдай тир Ислам Гьуьсейнова (85 кг-дин заланвал авайбурун арада) къизилдин медаль къазанмишна.
Гуьгъуьнин йикъарани жуьреба-жуьре рангарин чIуларин сагьибрин арада чи ватанэгьлияр тафаватлу хьана. ИкI, чIулав рангунин чIуларин сагьибрин арада Артур Агъаширинов (65 кг, кимоно алачиз) — буьруьнждин; мичIи яру рангунин чIуларин сагьибрин арада Имам Жамирзеев — гимишдин (110 кг, кимоно алаз) ва къизилдин («абсолютка», кимоно алаз); Рамазан Керимов (70 кг, кимоно алачиз) — къизилдин; вили рангунин чIуларин сагьибрин арада Артур Къазиев (80 кг, кимоно алачиз) — гимишдин; лацу рангунин чIуларин сагьибрин арада Рагьим Бегов (60 кг, кимоно алаз) — къизилдин ва гимишдин («абсолюткада» кимоно алаз ва кимоно алачиз) медалриз лайихлу хьана.
Чемпионатда мастеррин арада кьиле фейи акъажунарни нетижалубур хьана. ИкI, шуьтруь рангунин чIуларин сагьибрин арада кьиле фейи бягьсера чи машгьур спортсмен Шакир Шемехова къизилдин пуд (80 кг-дин заланвал авайбурун арада ва «абсолюткада», кимоно алаз, гьакIни 80 кг-дин заланвал авайбурун арада, кимоно алачиз) ва гимишдин («абсолюткада», кимоно алачиз) са медаль къазанмишна. Шуьтруь рангунин чIуларин сагьибрин арада Мугьаммад Мислимов (85 кг, кимоно алаз) — гимишдин ва къизилдин (кимоно алачиз) медалриз лайихлу хьана. Вили рангунин чIуларин сагьибрин арада Сагид Бабаева (100 кг-дилай гзаф заланвал авайбурун арада, кимоно алачиз) къизилдин медаль къазанмишна. Лацу рангунин чIуларин сагьибрин арада Камал Межидов (100 кг) — къизилдин (кимоно алаз) ва гимишдин (кимоно алачиз) медалриз лайихлу хьана.
Рагнеда Рамалданова
