Ватандин ЧIехи дяведа гъалибвал къазанмишна 80 йис тамам хьунин суварин вилик Россиядин ФСИН-дин (Федеральная служба исполнения наказаний) Дагъустан Республикада авай Управленидин къуллугъчийри Макарован тапанчидай лишанар кьунай командайрин арада акъажунар кьиле тухвана. Идакай чаз идарадин пресс-къуллугъди хабар гана. ИкI, махсус серенжемар кьилиз акъуддай (спецназ) «Орёл» отделдин базада кьиле тухвай акъажунрин макьсад Ватандин ЧIехи дяведин йисара уьлкведин азадвал ва аслу туширвал патал чанар гайи аскеррин ва ветеранрин экуь къаматар рикIел хкун, чан аламайбуруз гьуьрмет авунин лишан тир.
Акъажунра УФСИН-дик акатзавай саки вири идарайрин къуллугъчийри чпин алакьунар къалурна. Абур ихьтин къайдада кьиле тухвана: гьар са иштиракчиди сифтедай ахтармишун патал 3 сеферда лишанар кьазвай, гуьгъуьнин 10 «ягъунай» очкояр гузвай. Абурун кьадар гзаф хьайи кас гъалиб жезвай, гьа икI, — командайрин арадани.
Къейд авун лазим я хьи, акъажунар кьиле тухун патал Макарован тапанчи хкягъун дуьшуьшдин кар тушир. ГьикI хьи, Ватан хуьзвайбурун гъиле цIудралди йисара и яракь хьана. Ам чIехибуру жегьил несилдал агакьарзавай пак адетар хуьн, ихтибарлувал ва Ватандин вилик ганвай кьинез вафалувал къалурзавай ярж я.
Акъажунар ачухай «Орёл» спецназдин начальник, къенепатан къуллугъдин полковник Абдулла Абдуллаева, иштиракчийрин тIварунихъ чими келимаяр лугьунихъ галаз сад хьиз, и серенжемдин макьсаддал, важиблувилелни фикир желбна. Ихьтин серенжемри неинки УФСИН-дин къуллугъчийрин алакьунар, вердишвал ахтармишзавайди, гьакI абурун ватанпересвилин руьгь хкажуниз куьмекзавайди, Ватандин ЧIехи дяведа чи чIехи бубайри гъалибвал къазанмишун, чи кьилел экуь михьи цав хьун патал лап еке къимет — чпин чанар къурбанд авурди — чна рикIелай ракъур тавун субутзавайди къейдна.
Къизгъиндаказ кьиле фейи акъажунрин нетижада гъалибчиярни майдандиз акъатна. Шад гьалара абурув виридав дипломар, гъалиб хьайи командадив Кубок вахкана.
Эхирдай кIватI хьанвайбуру Ватан патал чанар гайи ксарин экуь къаматар, са декьикьада кисна акъвазуналди, рикIел хкана.
Рагнеда Рамалданова
