Шабанов Аслан 1982-йисуз Дербент райондин Араблинка хуьруьн патав гвай МЖС-да (межрайонная животноводческая станция) шофер яз кIвалахай Велибеган хизанда дидедиз хьана. Аслана поселокдин асул мектеб акьалтIарна,10-11-классар Белиждин гимназияда куьтягьна.
2000-йисуз Асланаз Россиядин Армиядин жергейриз эверна. Ам Владимирдин областдин Ковров шегьерда авай военный частунин улакьрин батальондиз рекье туна. Ругуд вацра учебкадилай гуьгъуьниз Наро-Фоминскда авай машгьур Кантемировский девизиядиз ракъурна. Ина йисни зура къуллугъна. Подразделенийрин арайра строевой, физический ва женгинин гьазурлухвилерай кьиле фейи акъажунра къазанмишай агалкьунрай Аслан «Воин-спортсмен» ва спортдин 3-дережадин мастервилин тIварариз лайихлу хьана. Армиядай ам старший сержантдин чин аваз хтана.
2004 йисуз А. Шабанова Чечен Республикадин Аргун шегьерда авай къенепатан кьушунрин частунихъ галаз пуд йисан икьрар кутIунна. Ина ада военный комендатурада къуллугъна.
2022-йисалди ада кьилдин ксарин хсуси кIвалера эцигунрин гьар жуьре кIвалахар авуна. 2022-йисан октябрдиз А. Шабановаз Россиядин Федерациядин яракьлу кьушунра къуллугъ хъийиз эверна.
Пуд йисуз ада вич авай мотострелковый батальондихъ галаз сифте Донецкдин областдин хуьрерани шегьерра, ахпа Запорожьедин хуьрера вичин женгинин юлдашрихъ галаз къуьн-къуьне аваз къати женгера иштиракна. И кIвалах ада гъалибвал къазанмишдалди давамарда.
Аслана лугьузвайвал, 2023-йисан гатуз Абаева команда гузвай вич авай мотострелковый батальонди Запорожье галай патахъ Работино-Вербовое линиядал миллетчийрин штурмдин батальонни механизированный бригада акъвазарна. Абур сенгеррай чукурна, са шумуд суткада дущмандин гьужумдикай агалкьунралди хвена. И женгина 200 кас есирда кьуна, са шумуд цIуд улакьни танкар кукIварна. Ина къалурай кьегьалвилерай батальондин командирдиз Россиядин Игит лагьай тIвар гана.
Са йисалай гзаф вахтунда къати женгер Запорожьедин областдин Работино вахчун патал кьиле фена. «Сифте чна Работино вахчуна, ана окопар эгъуьнна, чун далдаламишна, — суьгьбетзава Аслана. — Хуьр акьван чIехиди туширтIани, им стратегиядин метлеб авай чка тир. Миллетчияр, Работино чи гъиле гьатна лагьана, секин хьанач. Чна абуруз, абуру чаз, акъваз тийиз, гуьлле гузвай. Абуру чпин цIийи къуватар кIватIна, акси гьужум гатIунайла, чун Работино туниз мажбур хьана, анай экъечIна. Стратегиядин важиблу чка хьуниз килигна, чи командованиди Работино вахчудай цIийи план туькIуьрна. Женгер къатидаказ, яргъалди давам хьанатIани, алатай йисан майдиз чна Работино азадна».
А. Шабанова заз РД-дин Кьил Сергей Меликова вичин диде Шагьсенем Мавлудиновнадиз ракъурнавай Разивилин чар къалурна. Ингье ана вуч кхьенватIа:
«Гьуьрметлу Шагьсенем Мавлудиновна! Зал 16544 нумрадин частунин командованидин патай куь хва, старший сержант Шабанов Аслан Велибеговича Ватан хуьнин рекье вилик эцигнавай везифаяр лайихлудаказ тамамарунай разивилин чар хтанва. Дегь девиррилай инихъ жуьрэтлу аскерри машгьурнавай Дагъустандин адетрив чешнелудаказ эгечIзавай, и кIвалах краралди тестикьарзавай Асланаз лап хъсан тербия гунай дериндай жуван ва Дагъустандин халкьарин патай разивал малумарзава.
ИкI дерибаш, викIегь, ватанперес, намуслу, рекьиз вафалувал къалурзавай хва дидедиз лап еке савкьат я.
Асланан вилик вири рекьер ачух я. Ада аскервилин буржи тамамарна, Россиядиз намуслувилелди къуллугъдайдахъ инанмиш я.
Чна чи ватанэгьли, старший сержант Аслан Шабановал дамахзава. Чаз адахъ агалкьунар хьана, ам рикIе авай мурадрихъ агакьна, ада уьлкведин оборонадин къудратлувал мягькемаруник мадни еке пай кутуна кIанзава.
Гьуьрметлу Шагьсенем Мавлудиновна, къуй квехъ мягькем сагъламвал хьурай».
Аслан Шабанов командованиди гьукуматдин шабагь гун патал къалурнава.
— Заз вун викIегь аскер, гьакI динэгьли хьизни чида. Къуллугъзавай частара вун хьтин ибадатзавайбуруз шартIар авани? — хабар кьуна чна.
— Эхь, гьелбетда. КIандатIа мусурман хьуй, кIандатIа хашпара, гьакI буддистни. Гьукуматдин къанунралди чпин динриз ибадат ийидай ихтиярар виридаз ава. Командованиди и рекьяй вирибуруз лап хъсан шартIарни тешкилнава.
Аслан мергьяматлувилин «Инсан» фондунин Белиж поселокда авай векилдин куьмекчи я. И фондунин мергьяматлувилин кIвалахрикай виридаз хабар ава. Абур кIеве гьатай виридаз куьмекдин гъил яргъи ийиз гьазур я.
Отпускдиз хтайлани, Аслан секиндиз акъвазнавач. Поселокда кьиле физвай жемиятдин кIвалахра иштиракзава ва лезги чIалал акъатзавай «Ас-салам» газет кхьинални инсанар желбзава.
Аслананни Шагьназан рухваяр тир СултIана — Махачкъаладин педколледжда, Салмана Белиждин медколледжда кIелзава. Руш ФатIимат 5-классда ава.
Чи мурад Аслан Шабановахъ мадни еке агалкьунар хьун, гъалибвал къазанмишна, вичин хизандин патав саламатдиз хтун я.
Къагьриман Ибрагьимов
