Мегьарамдхуьруьн райондин юкьва, тIе­биатдин мублагь, гуьзел маканда, гуьрчег са хуьр экIя хьанва – Ярагъ-Къазмаяр. ТIварцIи лугьузвайвал, и хуьр куьгьне Вини Ярагърихъ галаз алакъалу я. Ана тахминан 1801-йисуз лезгийрин машгьур ашукь ва шаир Уьзден дуьньядиз атана. Ам дидедиз хьайидалай инихъ цIи 225 йис жезва.

И мукьвара Ярагъ-Къазмайрал Ашукь Уьзден рикIел хкунин шад мярекат кьиле фена. Ам хуьруьн юкьван мектебдин регьбер Аюбова Фезина Мигьралиевнади ачухна, дидед чIалан ва эдебиятдин муаллимар тир и цIарарин автордини Эльза Эфендиевади райондин медениятдин къуллугъчийрин куьмекдалди кьиле тухвана.

Мярекатда гзаф кьадар хуьруьнвийри ва мугьманри иштиракна. Абуруз анал рахадай, чпин фикирар лугьудай мумкинвални хьана. Сифте гаф гайи ашукь Уьзденан невейрикай тир Гьажиагьмед Гьажиагьмедова ата-буба рикIел хкунал вич пара шад тирди къейдна, ашукь Уьзденакай ктаб кхьей Дагъустандин халкьдин шаир Сажидин Саидгьасановаз ва адан къамат шикилда арадал хкай Мелик Агъабалаеваз рикIин сидкьидай сагърай лагьана.

Суварик атанвай мугьманрин арада­ «Лезги газетдин» хсуси корреспондент Абду­лафис  Исмаилов,  «Кард» журналдин  ре­­дактор ва «Дагъустан» РГВК-дин телеве­дущий Владик Батманов, шаир ва алим Азиз Мирзебегов, шаир ва муаллим Мукаил­ Агьмедов, Дагъустандин писателрин союздин секретарь Максим Алимов, жемиятдин деятель ва шаир Агьмад Зиядов ва маса гьуьрметлу ксар авай.

КIватI хьанвайбурун гуьгьуьлар Лезги театрдин артистри мадни хкажна. Хуьруьн школадин аялри Ашукь Уьзденан ва маса шаиррин шиирар кIелна, адан уьмуьрдай сегьнеяр къалурна, манияр тамамарна. Таъсирлу­даказ халкьдин манияр тамамарай муалли­марни къерехда амукьнач. Да­гъустандин ла­йихлу артистка Фаризат Зейналовадин, райондин ашукьрин дестедин, Айдунан ва Эсфирадин, Мурад Ашуралиеван маниярни залда ацукьнавайбуру гурлу капар ягъуналди кьабулна. Мярекат муаллим Магьият Гьадисовнади вичи кхьей «Ярагърин хуьр» шиир кIелуналди  акьалтIарна.

Магьият  Жаруллаева,

РФ-дин лайихлу муаллим