Мегьарамдхуьруьн райондин Самур хуьре и йикъара муниципалитетдин  хуьруьн майишатдин отделди мармардин шутIрахъ галаз женг чIугуниз талукьарна  тешкилнавай семинар кьиле тухвана, хабар гузва райондин информациядин къуллугъди.

Мярекатда неинки мектебда кIелзавай аялри ва муаллимри, гьакI  хуьруьн администрациядин кьил Рафим Шагьпазовани иштиракна.

Семинардин асул пай шуьтруь рангунин мармардин шутIар желбдай чартмаяр гьазуруниз талукь тир. Хуьруьн майишатдин отделдин директор Артур Гьажиева аялриз ихьтин чартмаяр гьазурдай пуд жуьре къалурна – абур вири гьар са касдивай гъилик квай материалрикай гьазуриз жезва. И гьерекатда аялрини активнидаказ иштиракна: абуру гьар са чартмадин кьетIенвилер ахтармишна, абур дуьздаказ туькIуьриз  ва учас­токра эцигиз чирна.

Исятда важиблу вахт алукьзава: зиянкар гьашаратар кьуьд акъудуниз гьазур жезва, гьаниз килигна, гьа и вахтунда абуруз «ракьар» эцигун нетижалу я. Гатфарихъ фад, пепейрал мад «чан ахкьалтайла», дуьз чкайрал тайинарнавай чартмайри зиянкаррихъ галаз женг чIугун кьезиларда.

Ихьтин тарсари мектебра кIелзавай аялриз неинки менфятлу вердишвилер гузва, гьакIни элкъвена кьунвай тIебиатдив жавабдарвилелди эгечIиз,  салара-багълара авай бегьер хуьз чирзава.

Саида  Мурадова