Дербент райондин администрациядин залда Жемиятдин палатади дяведин махсус серенжемдин иштиракчийрихъ, абурун хизанрихъ, гьакlни властдин органрин векилрихъни жемиятдихъ галаз гуьруьш кьиле тухвана. Ана РД-дин Жемиятдин палатадин председатель Азизбег Черкесова, палатадин векилар тир Къагьриман Ашурова, Алибег Алиева, регионалный «Все вместе» фондунин директор Селимхан Мирзеханова, РД-дин здравоохраненидин министрдин заместитель Патхула Патхулаева, РД-дин зегьметдинни яшайишдин рекьяй вилик тухунин министрдин заместитель Зураб Багьомедова, райондин Жемиятдин палатадин председатель Фетулла Фетуллаева, гьакlни райондин саки 200 агьалиди иштиракна.
Дербент райондин администрациядин кьил М. Рагьимова махсус серенжемда къуллугъзавай аскерринни абурун хизанрин месэлайриз кьетlен дикъет гузвайди къейдна. Гьи месэла хьайитlани, гьам чилин участокрихъ, гьам яшайишдихъ галаз алакъалу, сифте нубатда гьялзава. Ада и гуьруьш тухуник кьил кутур РД-дин Жемиятдин палатадиз сагърай лагьана.
А. Черкесова вичин рахунра дяведин махсус серенжемдин иштиракчийриз ва абурун хизанриз куьмекун гьукуматдинни жемиятдин кьилин везифайрикай сад тирди лагьана. «Къе чун кlватl хьунин себеб — Ватан хуьзвайбуруз чи гьуьрмет къалурун ва сагърай лугьун, чаз абурун ван хьун ва вилик акъваззавай месэлаяр санал гьялдай рекьер жагъурун я».
Ф. Фетуллаева здравоохраненидин месэлайриз фикир гана: «Къе райондин агьалийриз, гьа жергедай яз махсус серенжемдин иштиракчийризни, Дербентдиз фин-хтун, хсуси клиникайра КТ-дин ва МРТ-дин ахтармишунар авун четин акъваззава. Чна минздравдиз ва «Ватан хуьзвайбур» фондуниз и рекьяй куьмек гунин гьакъиндай чарар кхьенва».
Кlватl хьанвайбуру чпин месэлаяр ва теклифар раижна. СВО-дин иштиракчидин са дидеди лагьана: «Чи аялриз куьмек неинки махсус серенжемда, гьакl ина далу патани герекзава. Гьалтзавай четинвилерихъ галаз хизанар кьилди амукь тавун важиблу я».
Жегьилрин тешкилатдин векилди къейдна хьи, ихьтин гуьруьшри гьукумдихъ галаз ачухдиз рахадай мумкинвал гузва ва абурув чи сес агакьзавайди къалурзава.
Къагьриман Ибрагьимов
