Россияда 1-апрелдилай алакъадиз, финансриз, ЖКХ-диз ва рекламадиз талукь са жерге цIийи къайдаяр къуватда гьатнава. Ингье са бязи дегишвилерикай чав ихьтин малуматар агакьнава:

- SIM-картайрин тайин кьадар – ги­ла РФ-дин ватандашриз 20-далай гзаф нумрайрин сагьибар жедай ихтияр авач;

- «Госкъуллугъар» порталда жуван SIM-картаяр нин кIвачихъ галатIа ахтармишдай мумкинвал жеда;

- интернетда реклама раижунай са кварталда къвезвай къазанжидин 3 процент налог яз гана кIан жеда;

- ЖКХ-да цIийи цIар – гила квитанцийра коммунальный къурулуш рекъемламишунин харжияр къалурда.

ОМС-дин полисдикай

Эгер ОМС-дин (обязательное меди­цинское страхование) полисдин нумра­ «Госкъуллугъар» порталда авай жуван профилдал алава авуртIа, медицинадин­ къуллугъриз талукь арзайриз ам вич-ви­челай акъатда.

ЦIийиз хьанвай чагъа аял сифтегьан 30 йикъан муддатда диде-бубайрин полисдай духтуррин гуьзчивилик кутаз жеда­.

Маса региондиз куьч хьайила, ОМС-дин полисда талукь къейд эцигун лазим я. Страховой тешкилат дегишар тавуртIани жеда, эгер гьа тешкилатди ана кIвалахиз хьайитIа.

Полисдай вини дережадин технологиядин медицинадин куьмек къачуз жеда, мисал яз - аудиологический скрининг ва я ЭКО.

ОМС-дин полисдин сагьибриз уьмуьр­да чарасуз тир дарманрин сиягьда авай дарманар пулсуздаказ къачудай ихтияр ава.

"Лезги газет"