Спорт

Игитвилин “Шарвили” эпосдин суварин сергьятра аваз Сулейман-Стальский райондин Чуьхверхуьре дуьньядин чемпион Малик Тагьирбегован регьбервилик кваз армспортдай акъажунар кьиле фена.


Турнирда 70-дав агакьна жегьилри иштиракна. Акъажунрин нетижайрай хъсан гьазурвал авай спортсменриз Сулейман-Стальский райондин спортдин, туризмдин ва жегьилрин крарин рекьяй комитетдин патай дипломар ва грамотаяр гана.

 

Россиядин боксдин федерацияди дуьньядин Гиннессан рекорд эцигунин шартIуналди боксдай лап еке ачух тренировка тешкилна.
Дуьньядин и рекорд Москвада эцигна. Яру майдандал 30 декьикьада пуд агъзур спортсменди кьве сеферда Олимпийский къугъунрин чемпионар тир Олег Саитован ва Алексей Тищенкодин регьбервилик кваз тренировкаяр авуна.
Мярекат Олимпиададин призёр, машгьур боксёр Софья Очигавади ва шоумен Дмитрий Нагъиева кьиле тухвана.
Ихьтин тренировкаяр чи уьлкведин гзаф регионра кьиле фена. Гьа жигьетдай яз — Дагъустандани. Ина “Дагэнергодин” ял ядай базада боксдай тренировка Европадин чемпион, Дуьньядин Кубокдин сагьиб, СССР-дин спортдин лайихлу мастер Нурмегьамед Шанавазова тухвана. Мярекатдиз ичкидилай ва бейгьушдилай аслубурун реабилитациядин “Каспий” сетдин къуллугъчияр, волонтерар ва анра сагъарзавайбур атанвай.
Санкт-Петербургда, Грозныйда, Краснодарда, Пермда, Тюменда, Кемеровода, Новосибирскда, Хабаровскда ва маса шегьерра и жуьредин тренировкайра 10 агъзурдалай гзаф ксари иштиракна.

 

21-июлдиз “Анжи Аренадал” “Анжидинни” “Амкардин” арада кьиле фейи къугъуниз килигиз муьжуьд агъзур тамашачи кIватI хьанвай.
РикIел хкин, алатай турда и кьве командани кумукьнавай: “Анжи” вичин чилел — “армейвийриз” (3:1), “Амкар” Грозныйда — “Ахматаз” (1:0).
Тамашачийри ва футболдал рикI алайбуру къейдзавайвал, Каспийскда чи команда вичин къуватрихъ агъуна, викIегьдиз къугъвазвай. Сифте къад декьикьада Гьасан Мамтов, гьар са легьзедикай хийир хкудиз, туп гьасятда Нигъматулинан варар галайвал ягъиз къугъвазвай. Болельщикри, гьар сеферда туп “Амкардин” голкипердин ихтиярда хьайила гьайиф чIугвазва. Гьасана кьуд сеферда мугьманар теспача авуна ва эхирни Брызгалова туп “Амкардин” варариз яна.
Кьвед лагьай паюна итижлу легьзеяр кьве команда патални жезвай. Тамашачийрин къалабулух мадни еке тир, амма мад садан вараризни тупар ягъиз хьанач, къугъун чи командадин хийирдиз 1:0 гьисабдалди акьалтIна.
Гила “Анжи” Москвада “Локомотивдихъ” галаз къугъвада.

 

Мукьвара Дербент шегьердин администрациядин культурадин, спортдин, жегьилрин политикадин ва туризмдин управленидиз ЮФО-да ва СКФО-да шашкайрин Федерациядин президент Сергей Александрин, чкадин федерациядин регьбер Тимур Къурбанов мугьман хьана.
РикIел хкин, 22-29-июлдиз Дербентда “Чайка” турбазада урусрин тIамайрай ЮФО-дин ва СКФО-дин чемпионат кьиле физва. Зонадинбур яз гьисабзавай и акъажунар тIамайрай Дагъустандин федерациядин президент Алаудин Мирзабалаеван меслятдалди ва адан къаюмвилик кваз лап вини дережада аваз тешкилнава. Спортсменар администрациядиз мугьман хьунин себебни акъажунриз талукь тешкиллувилин месэлаяр веревирд авун тир. Управленидин начальник Арсен Арухова кьиле тухвай совещанидилай кьулухъ спортдин отделдин начальник Новаи Рзаева ва и отделдин пешекар Валерий Юнатаева акъажунар вини дережада аваз кьиле фин патал вири алахъунар ийизва.
ИкI, акъажунар итимрин арада кьиле физва, са командада 3 кас ава.