«Зун ви сесинал рикIивай ашукь я»
Газетдин алай йисан 40-нумрада чна лезги руш Карина Исмаилова НТВ каналди, международный информациядин агентстводи ва Спутник радиоди тешкилнавай музыкадин «Ты супер! 10 лет спустя» шоудин финалдиз акъатнавайдакай хабар ганай. 1-ноябрдин нянихъ неинки Россиядин, гьакI маса уьлквейрин гзаф тамашачиярни музыкадин шоудиз килигна.
Инал къейд авун лазим я хьи, тешкилатчийри «Ты Супер!» шоу уьмуьрдин четин шартIара гьатнавай аялриз (детдомрин тербиячияр, маса хизанри хвавиле, рушвиле кьабулнавайбур, къаюмвилик квайбур, са бязи сагъламсузбур), манияр лугьунай чпин алакьунар ачухиз куьмек гун патал тешкилнавайди я.
ЦIуд лагьай сезондин къайда масад хьана. Алатай цIуд шоуда иштиракай, гила чеб авайдалай чIехи хьанвай, музыкадин школайра, колледжра кIелзавай, сегьнеда са гьихьтин ятIани агалкьунар къазанмишзавай 50 манидардиз мад эвер хъувуна ва абурун арада сад лагьай чка кьун патал халисан женг малумарна. И манидаррин арада, чна винидихъ къейднавайвал, 2017 ва 2019-йисара «Ты супер!» шабагьдиз лайихлу хьайи чи лезги руш Карина Исмаиловани авай.
Финалдиз экъечIун патал манидарри ярумчух пуд финалда чпин алакьунар къалурна. Абурукай кьилин конкурсдиз 12 кас акъатна, гьа гьисабдай яз – Каринани. Ада «Жегьре рангунин фламинго» мани лагьай жуьреди неинки зал, гьакI жюридин членарни гьейранарна. Игорь Крутоя лагьана: «Вун манидин къаматда виш процентдин гьахьна, вун гьазуран артистка я. Вуна вири суьгьуьрда туна». Лиза Ёлкади малумарна: «Вуна мани акьван рикIин деринрай лагьана хьи, яб акалзавайбур гьейранарна. Зун ви сесинал рикIивай ашукь я». «Карина, ви сесини, мани лугьунин тегьерди зун шадарна. Вун финалдиз лайихлу я», – лагьана Диана Арбенинади. Александр Панайотова чи рушаз са шумуд сеферда аферин малумарна.
Эхь, дугъриданни, Каринадин сес яб акалзавайдаз таъсирдайди, ширинди, назикди, руьгьдиз гьахьдайди я. Сесинилай гъейри, тамашачийриз чи руша мани лугьузвай тегьердини эсерзава. Ам михьиз манида ихтилат физвай вакъиадин уьмуьрда, кIалубда гьахьзава, гьар са гафунин мана яб акалзавайдан рикIив агакьдайвал тамамарзава. Ибурухъ галаз сад хьиз, тамашачияр сегьнеда мани лугьузвай рушан, артисткадин акунрини гьейранарзава, адан къаматдал ашукьарзава, жюридин член Лиза Ёлка хьиз.
РикIел хкун лазим я хьи, Каринадин аял вахтар са акьван хъсанбур хьанач. Вад йисни тахьанмаз, адан дах рагьметдиз фена. Ихьтин зулуматдин дерт дидедивай эхиз хьанач. Адахъ вичин баладихъ гелкъведай, ам кIвачел акьалддай, адаз дидедин кIанивал, чимивал багъишдай къуват амукьнач. Детдомдиз вугудай чкадал атай Каринадин куьмекдиз эме атана. Ада вичин хтул хвена, адаз уьмуьрдин рекьел экъечIиз куьмекна. Вичелай алакьдай кьван галайвилерни авуна.
Ихьтин къаюмвили, куьмекди хъсан нетижайрални гъана. ГъвечIи чIавалай музыкадал, манияр лугьунал рикI алай руша, умуми образованидин школада хьиз, музыкадин школадани чирвилер къачуна. Школада кьиле физвай шадвилин мярекатрилай гъейри, шегьердин жаван манидаррин конкурсра, фестивалра иштиракна. Гьа са вахтунда ада вичин алакьунар аниматорвилени ахтармишна. Шегьердин гьаятра, аялрин бахчайра агьалийриз, иллаки аялриз, шад легьзеяр багъишиз, ада вичиз гъиле-тупIа ийидай кепекарни къазанмишиз хьана.
Сегьнейриз мукьвал-мукьвал экъечIуни, жуьреба-жуьре манияр лугьуни, аниматорвал авуни рушаз сегьнеда вич тухудайвал чирна. И рекьяй ада вичиз са тIимил тежриба кIватIна. Шегьерда тешкилзавай музыкадин, манидаррин «Махачкъаладин жаван гъетер», «Дагъустандин чубарукар» аялрин конкурсра кIвенкIвечи чкаяр кьуни адак мадни гьевес кутуна. Гьа икI ам НТВ-дин музыкадин «Ты супер!» шоудизни акъатна. И чIавуз Каринадин 15 йис тир. Шоуда иштиракдай ихтияр къачун патал ада Россиядин ва СНГ-дин шегьерра кьиле фейи хкягъунин концертра иштиракна. РикIел хкин, чи руша Алла Пугачёвадин репертуардик акатзавай «Чун гатазватIани, чна лув гузва» мани тамамарна. Жюридин членар тир Лиза Ёлкади, Маргарита Cуханкинади, Виктор Дробышева ва Стас Пьехади мани лагьай тегьердиз дуьзгуьн къимет гана ва лезги рушаз мани лугьунин хсуси кьетIен жуьре дегишар тавун меслят къалурна. Гьа са вахтунда Каринадин сесинин гуьзелвал, везинлувал къейдна.
Устадрин меслятрал амал авур руша вичин алакьунар мадни ачухарна, шоудин пуд паюнай ва ярумчух финалдайни экъечIна, Кремлдин дворецда кьиле фейи финалдин концертда иштиракна. Им лезги руш патал гьич фикирдизни гъиз тежедай кар тир. Ада Россиядин эстрададин тIвар-ван авай манидарар Алексей Воробьевахъ ва Диана Анкудиновадихъ галаз санал Роберт Рождественскийдин чIалариз туькIуьрнавай «БарбатIнавай столдин патав» мани лагьана. Чи рушан гуьзел сесинихъ зурба дворецда кIватI хьанвай вишералди тамашачийри яб акална ва адаз гурлудаказ капар яна. Ида Каринадин руьгьдик лувар кутуна.
2019-йисузни Карина «Ты супер!» шоудин вири уламрай финалдиз экъечIна. И йисуз адаз «ТЭФИ-KIDS» премия гуниз талукьарнавай шадвилин мярекатда мани лугьуниз теклифна ва лезги манидарди вичикай тамам артистка хьанвайди успатна.
2020-йис Карина патал мадни лишанлуди хьана. Ада «Россия-1» телеканалдин «Ну-ка, все вместе!» шоуда иштиракна. Жюридин 100 векилдикай 86 устадди Каринади лагьай манидиз баллар гана. Жюридин председатель Сергей Лазарева Исмаиловадин сесинин гужлувал, везинлувал, кьетIенвал иллаки къейдна. Жюридин членрин тIалабуналди Каринади лезги «Яр акуна» манини устадвилелди лагьана.
2021-йисуз Исмаиловади Гнесинрин тIварунихъ галай музыкадин училище яру диплом къачуналди акьалтIарна. Устад манидар хьиз тIвар акъатнавай рушаз Москвада тешкилзавай жуьреба-жуьре мярекатриз теклифзава. Мисал яз, ада телевиденидин «Жара Kids Awards» премия гуниз талукьарнавай межлисда иштиракзава ва «Алем» тIвар алай вичин хсуси мани тамамарзава. Эхь, Каринади манияр кхьизва ва абур гваз ам сегьнедизни экъечIзава. Ада уьлкведин музыкадин машгьур устадар тир Евгений Сафоновавай, Алексей Воробьевавай, Марк Тишманавай герек чирвилер, вердишвилер къачузва.
ЦIи кьиле фейи юбилейдин «Ты супер!» шоуда Исмаиловади кьвед лагьай чка кьуна. Тешкилатчийрин патай адаз махсус диплом, 500 агъзур манат ва маса пишкешар гана. Умудлу я, Каринадин сесини мадни гужлудаказ ван ийида, ада искусстводин алемда лайихлу чка кьада.
Нариман Ибрагьимов