Суварин тебрик
Халкьарин садвилин йикъан вилик, 2-ноябрдиз, меркезда, Дуствилин кIвале, дяведин махсус серенжемдин иштиракчийриз ва абурун хизанриз концерт гана. Шад мярекатда Дагъустан Республикадин Гьукуматдин Председатель Мегьамед Рамазановани иштиракна ва кIватI хьанвайбуруз РД-дин Кьил Федор Шукинан ва вичин патай сувар мубаракна, и сувари алатай вахтара Ватандин кьисметдин патахъай умуми жавабдарвал аннамишуни, хивез еке везифаяр къачуналди, чи халкьдиз гзаф четин имтигьанрай экъечIиз куьмек гайи вакъиаяр рикIел хкизвайди къейдна.
«Аскеррин ва абурун багърийрин гьакъиндай къайгъударвал чIугун чи кьилин везифайрикай сад яз амукьзава. Дагъустанда СВО-дин иштиракчияр ва абурун хизанар яшайишдин рекьяй хуьдай къурулуш кардик ква. Ватан хуьзвай гьар са касдиз ва адан мукьва-кьилидаз чун чпиз гьамиша куьмек гуз гьазур тирдакай чир хьана кIанда. Ихьтин гуьруьшри чаз Ватандин итижар хуьзвайбуруз, умуми гъалибвал мукьва авун патал зегьмет чIугвазвайбуруз сагърай лугьудай мумкинвал гузва», – лагьана М. Рамазанова
Гьукуматдин Председателди къейдна хьи, халкьарин садвал ва сада-садаз гьуьрмет авун Дагъустан патал гьамиша важиблу ерияр я. Дагъларин уьлкведин чилел асирралди жуьреба-жуьре халкьарин, культурайрин векилар ислягьвилелди, меслятдивди яшамиш жезва. Государстводин Кьили 2026-йис Россиядин халкьарин садвилин йис яз малумарунни дуьшуьшдин кар туш.
КIватI хьанвайбурун вилик РД-дин Халкьдин Собранидин Председателдин заместитель Марат Саидовни рахана.
Росгвардиядин Махачкъаладин военный частунин оркестрди ва «Адемос» шоу-балетди концертдин программа ачухна. Сегьнедиз казакрин манияр лугьудай Терский ансамбль, «Ватан» десте ва Денис Федоренко экъечIна. Лезгийрин, аваррин, азербайжанрин халкьдин манийрихъ яб акална.
Абад Азадов