Икьрар кутIуниз кIанзава

США-дин регьбер Дональд Трампа Ирандиз Вашингтондихъ галаз икьрар кутIуниз кIанзава лагьана. «Абуруз икьрар кутIуниз кIанзава. Килигин», ­– лагьана ада «New York Post» чешмедиз гайи интервьюда.

Ирандихъ галаз ала­къалу яз США-дин макьсадриз талукь суалдиз жаваб гудайла­, Трампа Тегерандихъ ядерный­ яракьар та­хьун­ герек тирди мад се­ферда лагьана. 

Къейд ийин, США-дини Израилди Ирандин объектриз 28-февралдиз ягъунар кьаз башламишна. Ирандини ягъунриз ягъунралди жаваб гана. Июндин юкьвара Тегерандини Вашингтонди дяведин гьерекатар акъвазару­нин гьа­къин­дай меморандумдал къулар чIугуна. Амма гуьгъуьнлай мад абуру сада-садан объектрал гьужумна. Исятдани абурун арада авай къалмакъал секин хьанвач, са икьрардал атанвач.  

Ормуздин проливдикай

Ормуздин проливда, вири терефрин къанунлу итижар фикирда кьуналди, Москвади дуьзгуьн гьалар арадал хкуник умуд кутазва. Ихьтин фикир РФ-дин МИД-дин векил Мария Захаровади малумарна. 

Адан фикирдалди, дуьньядин экономика патал важиблуди тир и «цин дамардикай» манийвал авачиз ва хатасузвилелди менфят къачун герек я.

Мад истемишзава

В. Зеленскийди, Россиядин нафт гьялзавай заводрал (НПЗ) са вацран муддатда гьужум ийидач лагьана хиве кьуналди­, идан эвезда Америкадин администрациядивай «Patriot» раке­таяр-перехватчикар гун истемишнава.

«Эгер чна са вацра гьужумна кIанзавачтIа, чаз са вацра бес жедай «Patriot» ракетаяр це», – малумарнава ада «Fox News» чешмедиз гайи интервьюда.

Алатай жуьмядиз вице-премьер Александр Новака Украинади Россиядин пуд НПЗ-дал ва газдинни химиядин комплекс­дал гьужум авурдакай хабар ганай. Гьа юкъуз РФ-дин Президентдин куьмекчи Юрий Ушакова Киевди нубатдин сеферда США-дин регьбер Трампан гафар саймиш тавурдакай ва Россиядин нафтIадин заводрал гьужум авунин гьерекатар башламиш хъувурдакай малумарнай. Ада алава хъувурвал, Украинадилай ихьтин гьерекатар кьилди алакьзавач ва Европа себеб яз жуьрэтлувал къалурзава.

Кьин кьазватIани…

Евросоюзди Россиядин газдикай кьил къакъудда лагьана кьин кьазва, амма гьакъикъатда мадни гзаф маса къачузва. «РИА Новости» чешмеди хабар гузвайвал, ихьтин фикир сенатор Алексей Пушкова малумарна.

Идалай вилик бязи чешмейри Россиядин газ Украинадай Европадив агакьарун гуьнгуьна хтун патал гуя США-ди алахъунар ийизва лагьана кхьенвай.

Сенатордин гафаралди, Европадин карханаяр ва муьштерияр Россиядин газ галачиз кIеве гьатзава. Россиядин газ Америкадин арачийрин куьмекдалди Европадиз агакьарунин патахъай Россиядинни США-дин векилрин арада жезвай веревирдерилай наразивал авуни, адан фикирдалди,  европавийрин жадувал къалурзава.  

Сечкийра иштиракиз жедач

США-дин президент Дональд Трампа, президентвилин­ къуллугъдин муддат куьтягь хьайила, машгьурвал ва тереф хуьдайбурун кьадар гзаф аваз хьунизни килиг тавуна, вичи къуллугъ тада лагьана хиве кьуна. Идакай «РИА Новости» чешмеди хабар гузва.

«Эхь, зун хъфида. Эгер гьахьтин мумкинвал авайтIа, за сечкийра мадни еке гьевесдивди иштиракдай, амма къайдаяр гзаф мягькембур я», – лагьана Америкадин регьберди «New York Post» газетдиз гайи интервьюда.

Къейднавайвал, президентвилин къуллугъдал адаз 2 йисан вахт ама, и муддатда ада гзаф крар ийиз агакьда лагьана инанмишвалзава.

Д. Трампа 2017-2021-йисарани президентвиле къуллугънай. 2024-йисан ноябрдиз ам мад сечкийра гъалиб хьанай ва 2025-йисан январдилай уьлкведин кьилин къуллугъдив эгечIнай. Президент хкядай нубатдин сечкияр США-да 2028-йисуз кьиле фин лазим я.

"Лезги газет"