Лайихлу тIварцIин сагьиб
И.П. Пирогова къейднавайвал, «медицинади инсанрин сагъламвал хуьзва, ветеринарияди – инсаниятдин». 1992- йисалай гьа и хиле кIвалахзавай РД-дин «Сулейман-Стальское РВУ» ГБУ-дин, 2021-йисалай Шихидхуьруьн ветеринарный участокдин заведующий Гьажиагъаев Майрудин Муьгьралиевичаз 2026-йисан 11-сентябрдиз «Дагъустан Республикадин ветеринариядин лайихлу духтур» гьуьрметдин тIвар гана. Шагьадатнамани медаль М. Гьажиагъаевав Дагъустандин Кьил Фёдор Щукина шад гьалара вахкана.
И мукьвара, вири Россияда хьиз, чи райондин къуллугъчийрини чпин пешекарвилин сувар – Ветеринариядин къуллугъчидин югъ – шад гьалара къейдна. ЦIинин сувар Майрудин Гьажиагъаеван рикIел геждалди аламукьдайди хьана.
М. Гьажиагъаев 1966-йисуз Сайтархуьре дидедиз хьана. 1983-йисуз Уллу-Гъетягърин юкьван школа акьалтIарна. 1984-1986-йисара ада Советрин Армиядин жергейра къуллугъна.
Чирвилерихъ къаних дагъви гада 1987-йисуз Дагъустандин хуьруьн майишатдин институтдин ветеринариядин факультетдик экечIна, 1992-йисуз анаг акьалтIарна.
Зегьметдин рехъ Майрудин Гьажиагъаева 1992-йисуз «Сайтаркентский» колхозда гьайванрин духтурвиле кIвалахунилай башламишна. 1994-йисуз ам Шихидхуьруьн участокдин санитарвиле тайинарна. 1998-йисуз анай Уллу-Гъетягърин участокдин заведующийвиле рахкурна.
2001-йисалай хъсан пешекар «Сулейман-Стальское РВУ» ГБУ-дин Шихидхуьруьн ветеринарный участокдин заведующийвиле тайинарна.
М. Гьажиагъаева вичин пешекарвилин чирвилер артухарунал кIвалахзава. Ада вичин хиве авай везифаяр намуслувилелди кьилиз акъудзава. Адаз коллективдин, халкьдин патай еке гьуьрмет ава. Майрудин Муьгьралиевичакай завай анжах хъсан патахъай рахаз жеда, – лугьузва райондин ветеринарный управленидин начальник Жамидин Мегьамедова. – Гьар йикъан зегьметдалди, гьайванрин сагъламвилин къайгъу чIугуналди, абурукай къачузвай суьрсетдал гуьзчивал тухуналди, хиве авай везифаяр намуслудаказ кьилиз акъудзавай адаз чи коллективда лайихлу гьуьрмет ава.
И йикъара гайи «РД-дин ветеринариядин лайихлу духтур» гьуьрметдин тIварцIелай гъейри, Майрудин Гьажиагъаевахъ республикадин ветеринариядин рекьяй Комитетдин, СтIал Сулейманан райондин администрациядин ва ветеринарный управленидин грамотаярни ава.
Хъсан пешекар хьиз, ам халкьдин арада гьуьрмет авай хизандин кьилни я. Хизанда пуд велед чIехи авунва.
Чна Майрудин Гьажиагъаеваз гьуьрметдин тIвар мубаракзава, адахъ мадни еке агалкьунар хьана кIанзава.
Асият Мирзалиева,
РД-дин культурадин лайихлу работник