Жемятдин хатасузвал таъминарин
Ахцегьа райондин муниципалитетдин кьил Абдул-Керим Палчаеван регьбервилик кваз терроризмдиз акси комиссиядин нубатдин заседание кьиле фена. Сифте гаф рахуналди, ада лагьана:
– Гьуьрметлу юлдашар, къе чун цIийи нацистрихъни фашистрихъ галаз дяведин махсус серенжем кьиле физвай кьетIен шартIара яшамиш жезва. Гьавиляй чи гьар йикъан кIвалахра, иллаки суварар, сечкияр хьтин вакъиайра халкьдин хатасузвал, сагъламвал хуьн сифте нубатдин истемишунрик акатзава. Школайринни идарайрин кьилер ва пешекарар хатасузвал таъминарунин месэладив акьалтIай жавабдарвилелди эгечIун иллаки важиблу я…
МВД-дин Ахцегьрин отделдин начальник Э. Ибрагьимова къейд авурвал, районда образованидин 23 идара ава. Абурукай 16 – школаяр (ана 2416 аялди кIелзава) ва 6 аялрин бахчаяр (586 аял ава) я. Пешекарри и идарайрин хатасузвал таъминарзавай гьал ахтармишна. Рехъ гузвай бязи кимивилер дуьздал акъудна ва абур вахтунда арадай акъуддай вахтар тайинарна. Сечкийрин вири вахтунда школаяр ва гьакI сечкийрин комиссийрин участокар (абур районда 26 ава, 17 – школайрин дараматра, 5 – культурадин кIвалера, 2 – спорткомплексра, амай кьвед – СП-дин администрацияда ва ФАП-да) вири махсус тадаракрин ва кицIерин куьмекдалди ахтармишна, гуьзчивилик кутада. Хатасузвал таъминарзавай и серенжемрив идарайрин кьиле авайбурни жавабдарвал гьиссунивди эгечIна кIанда.
Веревирдзавай месэладай талукь малумат Ахцегь райондин ТИК-дин председатель Э. Шихамадова гана. Кьилди къачуртIа, ада сечкийрин таблигъатдиз талукь документарни литература чкадал алайдакай, игьтият хуьн яз, сесер гудай участокра электрогенераторар, онлайн режимдин видеорегистраторар, куьчейра йифен эквер хьун герек тирдакай хабардарна.
Райондин образованидин управленидин начальник З. Муталибовади школаяр кIелунин цIийи йисаз гьазур тирдан, аялрин хатасузвал хуьниз талукь серенжемар кьабулзавайдан гьакъиндай малумарна.
Мярекатда иштиракай юлдашрин рахунар фикирда кьуналди, терроризмдиз акси комиссияди талукь ва вахтунда кьиле тухун лазим тир серенжемрин гьакъиндай къарар кьабулна.
Дашдемир Шерифалиев