Алай йис неинки Дагъустан, гьакI маса  уьлквеяр, республикаяр патални гзаф татугайди хьана. Гзаф чкайра хуьрер, рекьер, кIвалер мартдин вацра къвайи марфарин селлери чукIурна, тухвана, инсанриз гзаф зиянар гана. ТIебиатдин  ихьтин татугайвилер Дагъустанда,  иллаки Хасавюрт райондин мулкара хьана, ина са шумуд хуьре мектебар, хсуси кIвалер, идараяр чукIурна, инсанар, яшамиш хьун патал,  маса чкайриз финиз мажбур хьана.

Гьелбетда, тIебиатдихъ галаз акъажиз, гьуьжетиз  жедач,  адахъ вичин чинебан сирер, къанунар ава. Гьавиляй, тIебиатдин шар­тIариз килигна, гьада къалурзавайвал уьмуьрни тухун лазим я. ЯтIани жуван уяхвални квадарна кIандач. Бубайрин мисалда лугьузвайвал,  «бармак кьилелламаз кIевиз кьуна кIанда». Аллагьдиз шукур, и къвалри­ ина авайбурун арада екебурукай сад тир Къурушрин хуьруьз са акьван еке зиянар ганач.

Гележегда ихьтин татугайвилерин вилик пад кьун патал Къурушрин хуьре,  кьиле жегьил муаллим Гьамзаев Исламни аптекарь Османов Нажмудин аваз, са десте кIватIна. Хуьруьн кьуд пата ва хуьруьн къеняй физвай цин къаналар михьдай меслятдал ­атана.

Сифте вири къаналар ахтармишна, къамишрини зирзибилди кьунвай вири чкаяр михьун кьетIна. И кар патал  еке бульдо­зер гъана, кIвалахдив эгечIна. Гьелбетда, четинвилерни гьалт тавуна амукьнач. Бязи чкайра къаналрин къене ва къерехра экъечIнавай тарар атIана, герек чкайрал сваркайрин кIва­­лахарни авуна. Гьа икI, хуьрел элкъвен­вай 9 ва хуьруьн къене авай 5 километр­дин яргъивал авай къаналар михьна. Тек са хуьруьн къеняй фенвай латарай 250 лафет зирзибил акъудна. Са юкъуз а жегьилри Москвадай Махачкъаладиз куьмек яз рекье тунвай къаналра авай лил акъуддай еке машиндал алай махсус насосни гъана.

Аллагь куьмек хьайи жегьилри чпин вилик эцигнавай везифаяр намуслудаказ кьилиз акъудна. Абуру  хуьруьн жемятди и крар кьилиз акъудун патал чпин патайни куьмек яз гайи пулдин харжийрай чухсагъул лугьузва. Вири санлай жемятди 2800 000 (2 миллионни 800 агъзур) манат пул кIватIна, абуру харж авур гьар са манатдин гьахъ-гьисаб жемятдин вилик авуна.

Ихьтин баркаллу кIвалахар кьилиз акъудай ва чпин хсуси пулдин такьатарни серф авур кьегьалрин тIварар кьун чарасуз яз  гьисабзава. Ингье абур: Гьажиев Фикрет – военный контрактник, Салманов Катиб – СВО-дин иштиракчи, Эскендеров Селимхан – бульдозерист, Айдаев Агъарагьим – СВО-дин иштиракчи, Нурметов Абдурагьман – СВО-дин ва Сирияда кьиле фейи махсус серенжемрин иштиракчи, трактористар тир Велиханов Марат ва Гьуьсейнов Гьасан.

Хуьр, жемятдин гележег патал зегьмет чIугур, гъиле кьур кар кьилиз акъудай ихьтин жегьилриз Къурушрин жемятди аферин лугьузва.

Гьажи  Къазиев, муаллим