Тумар цазва

Дагъустанда 2027-йис патал зулун магьсулар цазва. Идакай Дагъустандин хуьруьн майишатдин ва недай суьрсетдин министерстводин телеграм-каналди раижзава.

Чешмеди къейдзавайвал, 92,5 агъзур гектарда тумар цун пландик кутунва. 46 агъзур гектардин кьуьгъверар гьазурнава.  КIвалахар давам жезва.

Раижзавай делилралди, сифтегьан 190 гектарда гьеле тумар цанва. Чпикай ихтилат физвай мярекатар кьиле тухун патал аграрийриз 20,3 агъзур тонн тумар герек къвезва.

Виликдай и чешмеди хабар гайивал, чуьлдин кIвалахриз гьазурвал акунин метлеблу хилерикай сад майишатар дизелдин кудайдалди таъминарун яз ама. И кар патал региональный кьуд оператор тайинарнава. Кудайди агакьарунин кIва­лах майишатри ганвай арзайрин бинедаллаз кьилиз акъудзава.

Къейдзавайвал, кьилинди аграрияр герек тир дережа гьазур яз хьун, тумар, кудайди ва маса такьатар вахтунда­маз  ага­кьарун,  кIвалахар  хъсан  шартIар авай муддатда кьилиз акъудун таъминарун я.

Сергьятрал кьван

Дагъустанда, догазификациядин прог­­раммадин сергьятра аваз, 1000 кило­метр­дилай гзаф чкада газдин турбаяр тухванва. Идакай «Дагъустан патал газ» телеграм-каналди раижзава.

Чешмеди къейдзавайвал, гила газ 11 агъзурдалай гзаф кьилдин ксарин  кIва­ле­рин сергьятрал кьван гъанва, абурун иесийривай сетдик экечIиз жеда.

Виридалайни активнидаказ чпин кIва­лер газдик Акуша, Ахцегь, Ботлих, Къи­зи­люрт, Къизляр, Сергокъала, Хасавюрт ва Мегьарамдхуьруьн районрин, гьакI­ни Махачкъала, Дагъустандин Огни шегьеррин агьалийри кутазва.

Раижзавайвал, догазификациядин прог­раммади чилин участокдин сергьятдал кьван гьакъи галачиз гъидай мумкинвал гузва, эгер кIвал газдалди таъминарнавай (газифицированный) чкада аваз хьайитIа. Участокдин къене кьиле тухудай кIвалахар ва газдин тадарак кутун кьилди туькIуьрзава.

Къейд ийин хьи, и чешмеди гьакIни виликдай раижайвал, Дагъустандин агьалийривай винидихъ къалурнавай (учас­токда турбаяр тухунин, газдин тадаракар маса къачунин) макьсадриз акъатзавай харжияр патал государстводивай 100 000 (виш агъзур) манат къачуз жеда.

Хабар гузвайвал, и кар патал кьве къайда ава.

1. Агьалидив ада тадарак маса къачуниз ва вичин участокда газ тухун патал авунвай кIвалахриз акъатнавай пул вахкуда. Раижзавай къейдерин гъавурда акьазвайвал, и кар патал яшайишдин рекьяй хуьдай идарадив (соцзащита) и документар агакьарун герек къведа: пас­порт, хизандин составдиз талукь справка, кIвалахар тухун патал тешкилатдихъ галаз кутIуннавай икьрар, тадарак маса къачунвайди къалурзавай чек, кIвалахрай пул ганвайди къалурзавай квитанцияр, агьали и серенжемдикай менфят къачуз жедай категориядик акатзавайди тестикьарзавай документар…

2. КIвал газдалди таъминариз ва та­да­рак къачуз кIвалин иесиди пулдин такьатар харж тавунани ийиз жеда. И кар патал ге­рек я: газдин компаниядихъ галаз газдин турба кIвализ гъунин пата­хъай икьрар­ кутIунун; и икьрар ва и се­ренжемдикай­ менфят къачуз жедай кати­гориядик акатзавайди тестикьарзавай до­кументар яша­йишдин рекьяй хуьдай идарадиз вугун. Яша­йишдин рекьяй хуьдай идаради газдин компанияди и макьсадриз ийизвай харжийрин гьакъи арада масад авачиз гуда.

Вичикай ихтилат физвай и жуьредин куьмек инвалидриз, гзаф аялар авай ва я тIимил дуллух агакьзавай хизанриз, тек пенсионерриз ва маса категорийрин агьалийриз гузва. И кардин жигьетдай генани тамам баянар «Дагъустан патал газ» телеграм-каналдай кIелиз, гьакI интернетдин маса чешмейрайни чириз ­жеда.

Рекъемар раижзава

Селлер атуникди зарар хьайи Да­гъустандин ва Чечнядин 140 агъзурдалай гзаф агьалийри выплатаяр къачунва. Идакай, махсус мярекатдал раиж авур къейдерал асаслу яз, Дагъустандин ЦУР-дин телеграм-каналди хабар гузва.

Къейдзавайвал, яшайишдин кIвал  терг ва я адаз хасаратвал хьанвай агьалийриз эвездин пулар хгун патал регионриз 5 миллиард манатдилай гзаф пулдин такьатар ракъурнава.

Гьа са вахтунда хабар гузвайвал, транс­портдин алакъа арадал хкунин кIва­­лахни давам жезва. Дагъустанда яргъивал, санлай къачурла, 34,5 километр­дикай ибарат тир рекьерин участокрал кIвалахар акьалтIарнава.

Гьазурайди – М. Агьмедов