Саласадиз РД-дин Кьилин везифаяр вахтуналди тамамарзавай Фёдор Щукина Москвада Россиядин ФСБ-дин директор, терроризмдиз акси милли комитетдин председатель Александр Бортникован регьбервилик кваз кьиле фейи НАК-дин заседанида иштиракна. Идакай чаз РД-дин Кьилин пресс-къуллугъди хабар гана.

Анал СКФО-да муниципальный дережайра чIуру крарин  вилик пад  вахтунда атIунин рекье жегьилрихъ галаз тухузвай кIвалах хъсанарунин месэлайриз килигна­.

А. Бортникова къейд авурвал, профилактикадин гегьенш кIвалахрин нетижада округда террориствилин тахсиркарвилерин кьадар тIимил хьанва. Гьа жергедай яз регионда информациядин майданар хуьнин карни виликандалай хейлин мягькемарнава. Кьилди къачуртIа, йисан эвел кьилелай  инихъ терроризмдин идеология ва миллетрин арада къалмакъал твазвай 4 агъзурдалай виниз ресурсар агалнава.

«Адалайни гъейри, са жерге мектеб­ра тамам яшдив агакь тавунвайбур террориствилин тахсиркарвилериз гьазурунал желб ийиз кIан хьайи алахъунрин вилик пад вахтундамаз кьуна. Кардал машгъул тушир жегьилар медениятдин, ватанпересвилин ва волонтервилин про­ект­ра иштиракунал желб авун артухарзава. ГьакI ятIани, нагьакьан таблигъатдин, чIуру крарал желб авунин гьерекат яваш жезвач», – къейднава чешмеда.

А. Бортникован гафаралди, исятда авай гьалари жегьилрихъ галаз мадни кIвалах тухун истемишзава, сифте нубатда - муниципалитетрин дережайра. Мектебрани вузра тербиядин кIвалахдин ери хкажун патал терроризмдиз аксивалунин хиляй муаллимринни пешекаррин гьазурлухвилиз кьетIен фикир гана кIанзава.

Заседанидин нетижада веревирд авур месэлайриз талукь яз чкайрал кьабулдай серенжемар тайинарна.

Чи  мухбир