ФЛНКА-дин телеграм-каналди хабар гайивал, и мукьвара республикада ва къецепата тIвар-ван авай лезгийрин художник Жавид Агъамирзаевич Агъамирзаев Москвада рагьметдиз фена. Ам рикIел хкун ва адаз рагьмет гъун патал жемиятдин «Дагъустандин ватанпересар» советди пашманвилин мярекат кьиле тухвана.
Ана художникдин багърийри, ярар-дустари, ватанэгьлийри иштиракна. Жавид Агъамирзаев гьихьтин инсан, бажарагълу художник тиртIа рикIел хкана, неинки Дагъларин уьлкведин ва Россиядин, гьакI дуьньядин искусстводик кутур паюникай лагьана.
Жавид Агъамирзаев 1937- йисуз Кьурагь райондин КьепIиррин хуьре дидедиз хьана. Аялзамаз бубадикайни дидедикай магьрум хьайи етим хуьруьн детдомда юкьван школа куьтягьай 1958-йисуз Москвадин художественный ва театрдин училищедик экечIна. Ахпа ада чирвилер, шикилар чIугунин вердишвилер МХАТ-дин школа-студиядин художественный факультетда артухар хъувуна.
Пешекарди вичин зегьметдин биография Дагъустандин телевиденида художник яз кIвалахунилай башламишна. Ахпа ада цIуд йисалай виниз вахтунда Лезгийрин СтIал Сулейманан тIварунихъ галай госмуздрамтеатрда художниквиле кьилин режиссер Багъиш Айдаевахъ галаз санал кIвалахна, цIудралди тамашаяр эцигунин карда шикилар чIугуналди, лазим сегьнеяр арадал гъуналди зегьмет чIугуна.
1972-йисалай ада галаз-галаз республикадин, вирисоюздин ва къецепатан выставкайра иштиракна, анра вишералди вичин шикилар эцигна. Пешекарри ва искусстводал рикI алайбуру адан яратмишунриз еке къимет гана. Бажарагълу художникдин суьретар, шикилар Москвадин ва Россиядин художникрин союзри, Франциядин, Япониядин, Германиядин, США-дин, Австриядин, Югославиядин, Словакиядин коллекционерри маса къачуна.
СССР-дин ва Россиядин художникрин союзрин, СССР-дин театрдин деятелрин Союздин член, Дагъустандин госпремиядин сагьиб Жавид Агъамирзаева вичелай гуьгъуьниз неинки искусстводин еке ирс, гьакI инсанрин рикIера экуь, къени инсандин къаматни туна. Ам пара инсанвал гвай, регьимлу, ачух, дуьз, вилера экуь нур авай инсан тир.
«Лезги газетдин» редакциядин коллективди рагьметлудан мукьва-кьилийриз башсагълугъвал гузва.
