4-августдиз РД-дин Кьилин везифаяр вахтуналди тамамарзавай Фёдор Щукина вичин 50 йисан юбилей къейдна. Ам 1976-йисуз Горькийдин областдин (гилан – Нижегороддин область) Починковский райондин Починки хуьре дидедиз хьана. Ада Нижегороддин, Мордовиядин госуниверситетра кIелна. 2004-йисалай Россиядин суддин къанунрин къурулушда кIвалахиз гатIунна. 2024-йисалай РД-дин Верхов­ный суддин председателдин вези­фа­яр тамамарзавай. РФ-дин Президентдин Указдалди 2026-йисан 4-майдиз ам Дагъустандин Кьилин везифаяр вахтуналди тамамарзавайди яз тайинарна.

Юбилей къейдзавай юкъуз Фёдор Щукиназ и шад вакъиа Россиядин Президент Владимир Путина тебрикна. Ада къейд авурвал, республикадин регьбердин далудихъ девлетлу пешекарвилин рехъ гала, судрин къурулушда кIвалахзавай йисарани ада вич лайихлувилелди къалурна, агьалийрин ихтиярар, итижар хуьнин рекье гьахълудаказ кIвалахна.

«Куь пешекарвили, тежрибади, мумкинвилери Дагъус­тан Республикадин вилик акъвазнавай жавабдар месэлаяр гьялиз, агьалийрин яшайишдин ери хъсанариз, Кеферпатан Кавказда миллетрин арада ислягьвални сад-садан гъа­вурда акьун таъминариз куьмекдайдахъ инанмиш я», – къейднава Президентдин Теб­рикдин чарче.

Фёдор Щукиназ юбилей мубарак авурбурун арада мадни РФ-дин Гьукуматдин Председатель Михаил Мишустин, Федерациядин Советдин Председатель Валентина Матвиенко, Патриарх Кирилл, РФ-дин Хатасузвилин советдин председателдин заместитель Дмитрий Медведев, СКФО-да РФ-дин Президентдин Векил Юрий Чайка, РД-дин Гьукуматдин Председатель Мегьамед Рамазанов, РД-дин Халкьдин Собранидин Председатель Заур Аскендеров ва масабур ава.  

Чи мухбир