ЦIийи ктаб
Лезгистанда чпихъ сур тарих, несилрилай-несилрал агакьнавай адетар, сеняткарвилер авай хуьрер тIимил авач. Гьахьтинбурукай сад Ярагърин хуьр я. Алатай йисан эхирра Махачкъалада урус чIалал «Ярагцы» («Ярагъвияр») тIвар алаз Фазилат Абдурагьимовна Абдурагьимовадин ктаб чапдай акъатнава.
Хайи хуьруьн тарихдин къайгъуда авай и лезги дишегьлиди 1975-йисуз ДГУ-дин тарихдин факультет акьалтIарна. Алай вахтунда Ф. Абдурагьимовади Махачкъаладин финансрин колледжда философиядин ва обществознанидин курсарай тарсар тухузва.
Зегьметдин ветеран Ф. Абдурагьимовадин къелемдикай хкатнавай ктабда Ярагърин хуьруьн тарихдикай, чи йикъарин Мегьарамдхуьруьн районда авай Ярагъ-Къазмайрин уьмуьрдикай, и хуьряй акъатнавай кьегьал рухвайрикай, рушарикай, лишанлу вакъиайрикай гзаф къиметлу делилар гьатнава.
Са шумуд кьиликай ибарат, тарихдин жуьреба-жуьре документар, шикилар гьатнавай и ктаб гьар са ярагъвидин, и хуьруьхъ галаз са гьихьтин ятIани алакъа авай гьар са ватанэгьлидин кIвале хьун герек я.
Ктаб Ярагъ-Къазмайрин хуьре авай са туьквендай маса гузва. Къимет — 1500 манат. Алакъадин нумра: 8-928-500-58-86. Ракъужат.
Агьмед Магьмудов
