РикIера хуьзва

4-декабрдиз Махачкъалада, Да­гъустандин писателрин­ со­юзда, лезгийрин машгьур гьикаятчи, публицист, са шумуд ктабдин автор Якьуб Яра­лиев дидедиз хьайидалай инихъ 95 йис тамам хьуниз талукьарнавай эдебиятдин межлис кьиле фена­. Ана Дагъус­тандин писател­рин со­­юздин лезги секция­дин председатель Максим Алимо­ва, Да­гъус­тандин халкьдин писатель Абдуселим Ис­маи­лова, Дагъустандин­ халкьдин­ шаир Фейзудин Нагъиева,­ «Лезги газетдин» кьилин редактор Мегьамед Ибрагьимова, Алкьвадар Гьасанан тIвар­цIихъ галай центра­дин регьбер­ Сефербег Гьа­мидова­, рагьметлу гьикаятчидин хизанри, мукьва-кьилийри иш­тиракна.

Эдебиятдин межлисдин сер­гьятра аваз Р. Гьамзатован тIварцIихъ галай ктабханадин къуллугъчи Секинат Мусаевади Якьуб Яралиеван уьмуьрдин ва яратмишунрин рекьиз талукьарнавай фикир желбдай выставкани тешкилнавай.

Мярекат Максим Алимова ачухна ва эхирдал кьван ада кьилени тухвана. Межлисдал рахайбуру Якьуб Яралиеван эсеррикай, ада лезги ва санал Да­гъустандин эдебият вилик финик кутур паюникай, адан инсанвилин ерийрикай чпин фикирар лагьана. Мегьамед Ибрагьимова Якьуб Яралиеван 100 йисан юбилейдиз гиламаз гьазурвилер акунин ва гьа чIавуз гьикаятчидин виридалайни хъсан эсеррин ктаб чапдай акъу­дунин теклиф гана. И теклиф гьам Дагъустандин писателрин союздин векилри, гьамни гьикаятчидин мукьвабуру хушдиз кьабулна.

Межлисдал Якьуб Яралиеван багъриярни рахана. Абуру чпин бубадин, стхадин къенивиликай, мугьманпересвиликай гзаф ихтилатар авуна. Эхирдай Якьуб Яралиеван хва Мурад Яралиева вичин бубадин экуь къамат рикIера хуьн патал адан юбилейдиз талукьарнавай межлис тешкилайбуруз сагърай лагьана.

Агьмед Магьмудов