7-июлдин йифиз Мегьарамдхуьре, Гилийрал, Гъепцегьрал ва Вини Тагьирхуьре чкадин агьалийрик ратарин азар (кишечная инфекция) акатнавай дуьшуьшар винел акъатна. РД-дин зравоохраненидин министерстводин делилралди, Мегьарамдхуьруьн райондин кьилин духтурханадиз медицинадин рекьяй куьмек герек яз 110 кас атана, абурукай 18 кас къаткурна.
РД-дин Роспотребнадзордин пресс-къуллугъди хабар гузвайвал, инфекция акатнавайбур асул гьисабдай 3-14 йисарин яшара авай аялар я. Абурукай четин гьалда са касни авач.
Управленидин пешекарри кьиле тухвай ахтармишунрин нетижада малум хьайивал, ратарин азар акатунин себеб винидихъ тIвар кьур хуьрерин агьалийри хъвазвай цин еридихъ галаз алакъалу я. Яд хъвадайвал гьазурун патал (мисал яз, герек кьадар хлор кутун ва икI мад) герек тир серенжемар кьиле тухванвачир, гьавиляй цин ери чIуруди хьана.
И дуьшуьшдин гьакъиндай республикадин къанун-къайда хуьдай органри уголовный дело къарагъарнава ва алай вахтунда ахтармишунар давам жезва.
«Лезги газет»
