Пака, 30-сентябрядиз, Дагъустандин Халкьдин Собранидин VII созывдин I сессия кьиле фида. Анал Собранидин Председатель, адан заместителар хкяда, парламентдин цIийи курулуш тестикьарда.

ЦIийи парламентдивай халкьди вуч вилив хуьзва? Зи фикирдалди, сифте нубатда, кутунвай умудар кьилиз акъатун. Сечкийрин вилик депутатар жез кIанзавай ватанэгьлияр районриз, хуьрериз фена, чкадин агьалийрихъ галаз гуьруьшар тухвана, абурун дердийрихъ яб акална, бязибуру куьмекар гун хиве кьуна. Жемятдиз герекди чпи хкянавай касди чеб рикIелай алуд тавун я. Хиве кьур гафар крариз элкъуьн я! Яшайиш хъсан хьун я! Депутатар халкьдин къуллугъда акъвазун я!

Адет тирвал, гьар са цIийи затI цIийивал я. Парламентда гзаф кьадар цIийи депутатар пайда хьанва. Абурун арада чпихъ халкьдин юкьва еке гьуьрмет авай, далудихъ  гзаф йисарин тежриба галай пешекарар, алимар, журналистар, карчияр, жегьиларни ава. Гьар садахъ хсуси программа, фикирар, къастар хьунни тIебии кар я. Герекди а къастар кьилиз акъуддай мумкинвилерни ашкъи хьун я! Гьабурни жедайдахъ чна умуд кутазва.

Мегьамед Ибрагьимов, «Лезги газетдин» кьилин редактор