7-майдиз Москвада, Кремлдин ЧIехи дворецда Владимир Путин Россиядин Федерациядин Президентдин къуллугъдив эгечIуниз талукьарнавай шадвилин мярекат кьиле фена.
Ам Кремлдин ЧIехи дворецдин Андреевский залдиз Россиядин Государстводин пайдах, Президентдин Штандарт, Россиядин Конституция ва Россиядин Федерациядин Президентдин Лишан гъунилай гатIунна.
Россиядин Федерациядин Конституциядин 82-статьядал асаслу яз, Федерациядин Советдин членрин, Государстводин Думадин депутатрин ва РФ-дин Конституционный Суддин судьяйрин иштираквал аваз Владимир Путина Россиядин халкьдин вилик кьин кьуна.
«Россиядин Федерациядин Президентдин векилвилер кьилиз акъуддайла, инсандин ва гражданиндин ихтиярризни азадвилериз гьуьрметда, Россиядин Федерациядин Конституциядал амал ийида ва ам, государстводин аслу туширвал, хатасузвал, битаввал хуьда, халкьдиз вафалудаказ къуллугъда”, — кьин кьуна Владимир Путина, РФ-дин Конституциядал гъил эцигна.
Конституционный Суддин Председатель Валерий Зорькина Владимир Путин Россиядин Федерациядин Президентдин къуллугъдив эгечIнавайди малумарна.
Владимир Путин Президентдин къуллугъдив эгечIунихъ галаз алакъалу яз, гуьгъуьнлай Соборный майдандал государстводин Кьилиз, Россиядин Федерациядин Яракьлу Къуватрин Верховный Главнокомандующийдиз Президентдин полк къалурна. ЦIи Президентдин полкуни вич тешкилай йикъалай инихъ 82 йис тамам хьун къейдзава.
Россиядин Президентдин къуллугъдив эгечIуниз талукьарнавай мярекат куьтягь хьайидалай кьулухъ Владимир Путина жегьилрин общественный объединенийрин ва волонтеррин тешкилатрин векилрихъ галаз куьруь суьгьбет авуна.
Геж хьиз Кремлдин Благовещенский соборда Москвадин ва вири Русдин Патриарх Кирилла ибадатдин дуьаяр авуна.
«Лезги газет»
